"Orta məktəblərdə dinlə bağlı məlumat verməliyik. Çünki din elə bir sahədir ki, burada boşluq olanda başqa ölkələr öz maraqlarını həyata keçirməyə cəhd göstərirlər”.
Bunu "Sherg.az”a sosioloq-alim, professor Əhməd Qəşəmoğlu deyib.
Ziyalı bildirib ki, illərdir gündəmə daşıdığımız problemləri aradan qaldırmaq üçün mütləq əməli iş görmək lazımdır:
"Biz tez-tez ölkəmizə İran, Ərəbistan, Türkiyə və başqa dövlətlərin dini qruplaşmalarının, o cümlədən xristian aləminin yad təsirlərindən danışırıq. Əgər müşahidə etdiyimiz boşluğu vaxtında doldurmasaq, təhlükəli tendensiya davam edəcək. Təhsil sistemində şagirdlərə normal dini bilgilər vermək mümkündür. Amma çox ciddi bir problemimiz var.
Bununla bağlı Komitəyə dəfələrlə tövsiyyələrimi vermişəm. Azərbaycanda dini məsələlərlə bağlı elmə əsaslanmış platforma və konsepsiya yoxdur. Konsepsiya hazırlanarsa, o zaman biləcəyik ki, ərəblərdən, İrandan və Türkiyədən hansı faydalı məqamları götürə bilərik. Sadaladığım ölkələrdə din tədrisi ilə bağlı təcrübə daha çoxdur.
Azərbaycanda konkret konsepsiya olmadığına görə, işimiz-gücümüz kənar təsirlərdən danışmaqdır. Xeyli vaxtdır, İran belə getdi, vəhhabilər elə gəldi, gülənçilər içimizə girdi və s. sözlərlə təhlükələri müzakirə edirik. Ancaq ortada real nəticə yoxdur.
Mütləq şəkildə düşünülmüş konsepsiyaya ehtiyacımız var. Özü də mollalarla, şeyxlərlə yox, alimlərlə birlikdə hazırlanmış ciddi elmi-əsaslı platforma olmalıdır”.
Alim vurğulayıb ki, orta məktəblərdə dinlə bağlı ayrıca fənni tədris etmək üçün təcrübəli kadrlarımız yoxdur:
"Mən öz şagirdlərimi, gənc nəsli başlı-başına buraxa bilmərəm ki, onların öz dinləri barədə anlayışları olmadığı üçün hərə bir tərəfə çəksin.
Ancaq din tədrisində xurafatyönlü məsələlər təbliğ olunmamalıdır. Daha çox fəlsəfi aspektdən maraqlı olan dini məqamları uşaqlarımıza aşılamalıyıq. İslamın əsas dəyərlərini dərindən öyrətməliyik. Bu sahədə Dini Komitənin mövqeyi ilə razıyam”.
İsmayıl
