Azərbaycanda may ayının 1-nə cəmi depozit bazasının həcmi 24 milyard 213,2 milyon manat olub.
Oxu.Az-ın məlumatına görə, bu göstərici ötən ilin eyni dövrü ilə müqayisədə 3,6 faiz azalıb, aylıq müqayisədə isə 1,6 faiz artıb.
Manatla olan depozitlərin həcmi 11 milyard 248,1 milyon manat (cəmi depozitlərin 46,5 faizi), xarici valyutada olan depozitlərin həcmi isə 12 milyard 965,2 milyon manat (cəmi depozitlərin 53,5 faizi) təşkil edib.
Manatla olan depozitlərin həcmi illik müqayisədə 25,6 faiz, aylıq müqayisədə isə 4,8 faiz artıb. Xarici valyutada olan depozitlərin həcmi isə illik müqayisədə 10,1 faiz, aylıq müqayisədə isə 1 faiz azalıb.
Depozitlərin 7,8 faizi maliyyə təşkilatlarının, 57,7 faizi qeyri-maliyyə təşkilatlarının, 34,5 faizi ev təsərrüfatının (fiziki şəxslərin banklardakı əmanətləri) payına düşüb.
Fiziki şəxslərin banklardakı əmanətlərinin həcmi 8 milyard 352,9 milyon manat olub. Bu illik müqayisədə 7,7 faiz, aylıq müqayisədə isə 2,5 faiz və ya 205,4 milyon manat çoxdur.
Əmanətlərin 51,3 faizini milli, 48,7 faizini isə xarici valyutada olan əmanətlər təşkil edib. Milli valyutada olan əmanətlərin həcmi illik müqayisədə 23,1 faiz, aylıq müqayisədə isə 5,9 faiz artıb. Xarici valyutada olan əmanətlərin həcmi isə illik müqayisədə 4,9 faiz, aylıq müqayisədə isə 0,8 faiz azalıb.
