Avropada işgüzar səfərdə olan Azərbaycan Demokratiya və İnsan Haqları İnstitutunun rəhbəri, hüquq müdafiəçisi Əhməd Şahidov Varşava şəhərində ATƏT-in Demokratik Təsisatlar və İnsan Haqları Bürosunu ziyarət edib.
Polşadan "Şərq”ə danışan Ə.Şahidov bildirib ki, ATƏT-in Demokratik Təsisatlar və İnsan Haqları Bürosunda Azərbaycandakı 11 aprel prezident seçkiləri barəsində geniş müzakirələr aparılıb. Təşkilat rəhbəri bəyan edib ki, görüş ATƏT-in Seçkilər Departamentinin rəhbəri Aleksandr Şlyuk, Omer Fişer və qurumun seçkilər üzrə məsləhətçisi, Azərbaycan üzrə kurator Radivoje Qrujic arasında baş tutub. Görüşdə Polşadakı Azərbaycan diasporasının rəhbəri Cavid Zeynalov da iştirak edib.
Hüquq müdafiəçisi Əhməd Şahidov 11 aprel tarixində Azərbaycanda keçiriləcək prezident seçkiləri barəsində görüş iştirakçılarına ətraflı məlumat verib. Həmçinin, ölkəmizdə seçki öncəsi vəziyyəti xarakterizə edib. Eyni zamanda ATƏT-in Demokratik Təsisatlar və İnsan Haqları Bürosunda Azərbaycanda seçkiləri müşahidə missiyasının önəmi barədə söz açıb.
Qurumun Seçkilər Departamentinin rəhbəri Aleksandr Şlyuk Azərbaycanda keçiriləcək Prezident seçkilərinə böyük maraq olduğunu bildirib. Şlyuk Demokratik Təsisatlar və İnsan Haqları Bürosunun Müşahidə Missiyasının Azərbaycandakı fəaliyyəti barədə geniş məlumat verib. Seçki öncəsi durum, seçki günü səsvermə prosesi və seçki sonrası vəziyyəti tam xarakterizə edəcək hesabatlar yayımlanacağını deyən qurum rəsmiləri 11 aprel seçkilərinin azad və şəffaf keçəcəyinə əmin olduqlarını ifadə ediblər.
İsmayıl
