Əmək və Əhalinin Sosial Müdafiəsi Nazirliyi (ƏƏSMN) sosial qayğıya ehtiyacı olan şəxslərin sığınacaqlara yerləşdirilməsi üçün müvafiq tədbirlər görür.
Bu günlərdə nazirliyin mətbuat xidmətinin rəhbəri Fazil Talıblı məlumat verib ki, vaxtilə iş adamı olmuş, ailəsi tərəfindən tərk edildiyindən səfil kimi yaşayan Akif Əliyev nazirlik tərəfindən yenidən xəstəxanaya yerləşdirilib.
F.Talıblı Akif Əliyevin səhhəti ilə maraqlanmaq üçün xəstəxanada ona baş çəkib: "Vaxtilə iş adamı olmuş, ailəsi tərəfindən tərk edildiyindən səfil kimi yaşayan Akif Əliyevin 1 saylı Kliniki Tibbi Mərkəzdə müalicəsi uğurla davam edir. Xəstəxanada onu ziyarət etdik. Akif müəllimin ən böyük arzusu tezliklə sağalaraq övladlarına qovuşmasıdır”.
Qayğıya ehtiyacı olan şəxslərin sığınacaqlara yerləşdirilməsini müsbət qiymətləndirən "Təmiz Dünya” Qadınlara Yardım İctimai Birliyinin sədri Mehriban Zeynalova sherg.az-a açıqlamasında bildirib ki, nazirliyin bu cür tədbirlər görməsi həmin şəxslərin normal qaydada cəmiyyətə inteqrasiyasına şərait yaradır:
"Sadəcə olaraq sənədləşmə ilə bağlı müəyyən prosedur qaydalarının sadələşdirilməsinə ehtiyac var. Məsələn, sığınacağa gələn insanların psixoloji vəziyyəti ilə bağlı arayışlar və ya digər sənədlər olmasa, onları sığınacağa götürmürlər. Məncə, bu tələblərə uyğun sənədlər həmin kateqoriyadan olan adamlar üçün əlçatmazdır.
Düşünürəm ki, qaydaların mürəkkəbliyi onların həmin sığınacaqlardan bəhrələnməsinə maneçilik törədir. Yaxşı olardı ki, sənədləşmə ilə bağlı qaydalar sadələşsin.
Sığınacağa qəbul olan şəxs xəstədirsə, dərhal xəstəxanaya yerləşdirilir və yaxud psixoloji durumu normal deyilsə, xüsusi müəssisəyə aparılır. Bütün bunlar cəmiyyətimiz üçün də faydalıdır. Çünki qayğıya ehtiyacı olan insanların dövlət himayəsinə alınması və onların normal şəxs olaraq cəmiyyətə qayıtması olduqca vacib amildir”.
Yeganə Bayramova
