Əhalinin aztəminatlı hissəsi hər zaman ölkə başçısının sosial siyasətində diqqət mərkəzində olub. Prezidentin "Aztəminatlı ailələrə birdəfəlik yardım verilməsi haqqında” sərəncamı aztəminatlı ailələrin maddi rifahının yüksəldilməsinə xidmət edir.
Ölkə başçısının imzaladığı sərəncam onun xalqımıza göstərdiyi diqqət və qayğının nümunəsidir. Aztəminatlı ailələrə edilən yardım ictimaiyyət üzvləri tərəfindən də böyük rəğbətlə qarşılanıb.
Milli Məclisin deputatı Aydın Hüseynov bildirib ki, Prezidentin Sərəncamı yürüdülən məqsədyönlü sosial siyasətin tərkib hissəsidir.
Deputat qeyd edib ki, ölkəmizdə əmək pensiyaları və sosial müavinətlər getdikcə artırılır, əlillərin, şəhid ailələrinin maddi rifahının yaxşılaşdırılması istiqamətində mühüm tədbirlər görülür: "Bu Sərəncam bir daha təsdiq etdi ki, Azərbaycanda əhalinin sosial rifahının daha da yüksəldilməsi dövlət siyasətinin başlıca istiqamətlərindən biridir. Prezident İlham Əliyevin tapşırıqlarına əsasən həyata keçirilən sosial müdafiə tədbirləri, həmçinin sığorta-pensiya sisteminin davamlı inkişafı sosial təminat sisteminin mühüm komponenti olan təqaüdlərin cari ildə də mütəmadi artımına imkan verib. Dövlət başçısı əhaliyə, xüsusilə sosial cəhətdən həssas qruplara sosial xidmətlərin göstərilməsi zamanı vətəndaş məmnunluğunu daim diqqət mərkəzində saxlayır. "Aztəminatlı ailələrə birdəfəlik yardım verilməsi haqqında” Sərəncam dövlətin məqsədyönlü və səmərəli sosial siyasətinin daha bir təzahürüdür”.
"Bakı-xəbər” qəzetinin baş redaktoru Aydın Quliyevin sözlərinə görə, aztəminatlı ailələrə göstərilən yardım ölkəmizdə fasiləsiz həyata keçirilən sosial müdafiə tədbirlərindəndir.
O bildirib ki, Azərbaycan sosial siyasətində dərin məzmunlu və çox istiqamətli fəaliyyət göstərməsi ilə dünya ölkələrindən fərqlənir:
"Prezidentin "Aztəminatlı ailələrə birdəfəlik yardım verilməsi haqqında” Sərəncamı həssas təbəqədən olan əhaliyə diqqət və qayğısının əyani sübutudur. Ölkə başçısı köməyə ehtiyacı olan insanları taleyin ixtiyarına buraxmır, zamanında öz dəstəyini göstərir. Ölkəmizdə ehtiyacı olan şəxslərə ünvanlı sosial yardımın verilməsi kimi geniş müdafiə tədbirləri görülür.
Cənab prezidentin atdığı sonuncu addım da əhalinin həssas təbəqəsinin, yəni aztəminatlı ailələrin sosial müdafiəsini gücləndirmək, maddi rifahını yaxşılaşdırmaq məqsədi güdür.
Azərbaycanda əhalinin qayğıya ehtiyacı olan təbəqələrinin müxtəlif formalarda sosial müdafiəsi fasiləsiz bir prosesdir. Ölkəmizin bu yöndə fəaliyyəti həqiqətən də dünya ölkələrinin fəaliyyətindən fərqlənir.
Aztəminatlı ailələrə birdəfəlik yardımın edilməsi onsuz da vəziyyəti həssas olan ailələrə dövlətin köməyidir. Bu istiqamətdə atılan addımlar ilk növbədə humanist xarakterilə seçilir, digər tərəfdən ölkədə müxtəlif təbəqədən olan insanlar arasında ədalətli bölgü prinsiplərinin qurulmasına xidmət edir”.
Yeganə Bayramova
