"Azərbaycan ictimai nəqliyyatındakı problemlər həddindən çoxdur. Bu sahədə sistemli iş görmək zəruridir”.
Bunu "Sherg.az”a Sumqayıt-Bakı istiqamətinə hərəkət edən marşrutlarda daha çox sərnişin yığmaq üçün qanunsuz olaraq kustar üsulla əlavə oturacaqlar quraşdırılmasından danışarkən nəqliyyat məsələləri üzrə ekspert Ərşad Hüseynov deyib.
Ekspert sərnişinlərin bu şikayətlərinin həqiqətə uyğun olduğunu təsdiqləyib:"Elə rayonlar var ki, orada ictimai nəqliyyatın vəziyyəti daha pisdir. Bu sahə ilə aidiyyəti orqanlar, hökumət məşğul olmalıdır. Ehtiyac varsa, investisiyalar cəlb olunmalıdır. Avtobuslar yenilənməli, sərnişindaşıma standartlara uyğunlaşdırılmalıdır.
Sərnişinlər çox olduğundan avtobus sahibləri də çox pul qazanmağa çalışır. Ona görə, əlavə oturacaqlar yerləşdirir, başqa üsullara əl atırlar. Amma nəzarət etmək mütləqdir.
Bu zaman isə başqa problem ortaya çıxır. Sürücüyə qanunsuz addım atmağa imkan verilmir, sərnişinlər isə avtobuslar az olduğundan, dayanacaqda gözləməli olur. Ona görə, çalışmaq lazımdır, həm təhlükəsizlik təmin olunsun, həm də sərnişinlərin ehtiyacı ödənsin”.
Aysel Aslan
