"Ermənistanın bütün siyasəti Azərbaycan torpaqlarını işğal etmək, özünə birləşdirməkdən ibarətdir”.
Bunu "Sherg.az”a Ermənistandakı daxili stabilliyin pozulmasından danışarkən millət vəkili Aydın Mirzəzadə söyləyib.
O diqqətə çatdırıb ki, separatçı ölkə qatı antiazərbaycan, antitürk siyasəti yeritdiyinə görə, Türkiyə ilə sərhədləri də bağlıdır:
"İşğalçı ölkə regionda blokadada olduğuna görə, Ermənistanın iqtisadi vəziyyəti də bərbad gündədir. Düşmən ölkə bu gün gəlirlərinin böyük hissəsini Azərbaycan torpaqlarını işğalda saxlamağa yönəldir. Hansısa inkişafdan, sosial problemlərin həllindən söhbət gedə bilməz. Əhali ölkədən köçür, qalanlar isə indiki erməni rəhbərliyindən ciddi narazılıq edir.
Prezident Serj Sarkisyanın konstitusiyanı dəyişməklə hakimiyyətdə qalmaq niyyəti heç nəyi dəyişməyəcək. Ölkənin vəziyyəti olduğu kimi qalacaq. Əhalinin narazılığı da artacaq. Yaxın zamanlarda Ermənistanda sosial partlayışın olacağı istisna deyil. Əhali yaşamaq istəyir, sosial problemlərini həll etməyə çalışır.
Ən əsası Azərbaycan torpaqlarının işğalda saxlanılmasının mənasız və perspektivsiz olduğunu bilirlər. Vaxtilə erməni millətçilərinə inanan kütlə bu gün həmin inamının acı meyvələrini dadmaqdadır. Hesab edirəm ki, Ermənistan təsadüfən qazandığı müstəqilliyi yürütdüyü siyasətlə itirə bilər”.
Aysel Aslan
