""Gürcü Arzusu” Partiyası Bidzina İvanaşvilinin rəhbərliyi altında hakimiyyətə gəldikdən sonra prezident üsul idarəsinin səlahiyyətləri minimuma endirildi”.
Bu barədə "Sherg.az”a Gürcüstanda hakim "Gürcü arzusu-Demokratik Gürcüstan" Partiyasının oktyabrın 28-də keçiriləcək prezident seçkilərinə namizəd irəli sürməməsinin səbəblərini izah edərkən politoloq Natiq Miri bildirib.
O qeyd edib ki, minimum səlahiyyətlə "Gürcü Arzusu” Partiyasının yenidən prezidentlik iddiasında olması cəmiyyətdə birmənalı qəbul olunmaz:
"Gürcüstanda güclü hökumət başçısı olduğu təqdirdə prezidentin bu ölkədə varlığı yalnız formal xarakter daşıyırdı. Ona görə, "Gürcü Arzusu” Partiyası namizədliyini irəli sürmək iddiasında deyil.Həmçinin regionda vəziyyətin həssas olması da proseslərə təsir göstərir. Xüsusilə, Ermənistanda "Məxməri inqilab”la hakimiyyət dəyişikliyi baş verdiyi üçün İvanaşvili rəhbərliyi də bu məsələdə ciddi narahatlıq keçirir. Çünki Ermənistanda tətbiq olunan üsullar, sosial etiraz dalğası Gürcüstanda da baş verə bilər. Bundan əvvəlki parlament seçkilərində "Gürcü Arzusu” Partiyası saxtakarlıqla qalib gəldi. Ona görə, müxalifət parlamentdə daha az yer tutdu. Gürcüstan cəmiyyəti B.İvanaşvilinin hakimiyyətindən narazıdır. Nəticədə bu iqtidarın seçkini qazanmaq şansı minimumdur. Yenidən saxtakarlığa getmək isə Gürcüstanda etiraz dalğaları ilə müşayiət oluna bilər”.
Qeyd edək ki, Gürcüstan parlamentinin sədri İrakli Kobaxidze "Hakim "Gürcü arzusu-Demokratik Gürcüstan" Partiyasının oktyabrın 28-də keçiriləcək prezident seçkilərinin ilk turunda qələbə qazana biləcək namizədlərinin çox olduğunu vurğulayıb. O bildirib ki, buna baxmayaraq, hakim partiya bu seçkilərdə heç bir namizəd irəli sürməyəcək".
Aysel Aslan
