“Kreml demək istəyir ki, əgər üstümə gəlsəniz, əlim çatan yerlərdə vəziyyəti qarışdıracam”
Rusiya Silahlı Qüvvələrinin Baş Qərargahının rəisi, ordu generalı Valeri Gerasimov Qafqazda, Donbasda və Orta Asiyada eyni anda müharibənin başlaya biləcəyini iddia edib. General bildirib ki, bütün region ölkələri gərgin dövrə hazır olmalıdır. Qlobal gərginliklərə diqqət çəkən Gerasimov münaqişə ocaqlarının bir-biri ilə bağlı olmadığını söyləsə də, hərbi toqquşmaların eyni anda alovlana biləcəyini istisna etməyib:
"Suriyada münaqişənin növbəti dəfə kəskinləşməsi Donbasda irimiqyaslı hərbi əməliyyatların bərpa olunması ilə eyni vaxta təsadüf edə bilər. Üstəlik, Orta Asiyada və ya Qafqazda, tutaq ki, Azərbaycanla Ermənistan arasında da müharibə başlayar və bütün bunlar hamısı eyni zamanda baş verər. Tamamilə real ssenaridir. Bütün bunlara hazır olmaq lazımdır”. General dünyadakı mürəkkəb vəziyyətin səbəbini ABŞ-ın özünü uzun illərdir yeganə superdövlət kimi təqdim etməsində görüb. Onun sözlərinə görə, artıq Amerikanın bu imici darmadağın olub və ABŞ bütün səylərini situasiyanın konservasiyasına yönəldib. Bunun nəticəsində isə dövlətlərarası qarşıdurmalar kəskin artıb. Bəzi ekspertlərin fikrincə, Gerasimovun mesaj xarakterli açıqlaması Rusiyanın bütün regionlarda eyni anda gərginlik yarada biləcəyinə işarədir.
Məsələni "Şərq”ə dəyərləndirən "Sivilizasiyalar və Konfliktlər” Analitik Mərkəzinin rəhbəri Əhəd Məmmədli də deyib ki, rus generalın açıqlaması Kremli sıxışdıran Qərb dünyasına siqnaldır:
"Rusiya hərbiçisi bu açıqlaması ilə Amerika və Avropaya demək istəyir ki, əgər çox üstümə gəlsəniz, əlim çatdığı yerlərdə vəziyyəti qarışdıracam. Lakin Rusiyanın bütün cəbhələrdə eyni anda vəziyyəti qarışdırmaq üçün kifayət qədər resursları yoxdur. Bunu da Qərb yaxşı bilir. Rusiya bir sıra bölgələrdə gərginlik yarada bilər, amma uzunmüddətli planlar qura bilməz.
Buna gücü yetməz. Bir də ki, Orta Asiya və ya Qafqazda vəziyyətin qarışması heç də Rusiyanın özünün maraqlarına uyğun deyil. Əgər müharibə olarsa, Azərbaycan Qarabağı qaytarar. Bununla da Moskva bizə qarşı əlindəki ən əsas təsir rıçaqını itirər. Orta Asiyada isə ara qarışarsa, orada islamçılar hakimiyyətə gələ bilər. Bu da regionun birdəfəlik Rusiyanın əlindən çıxması deməkdir.
Üstəlik, Orta Asiyanın bataqlığa çevrilməsi paralel olaraq Rusiyanın da qarışmasına səbəb olacaq. Rusiya ərazi baxımdan çox böyükdür və orada aranı qarışdırmaq elə də çətin deyil”.
İsmayıl
