Rusiyanın ardınca Fransa da "erməni soyqırımı”nı inkar edənlərə cəza verilməsi məsələsini gündəmə gətirib. Parlament "soyqırımı” inkar edənlərə qarşı cəza növünü nəzərdə tutan qanun layihəsini bəyənib. Bundan sonra qanunverici orqanın aşağı palatası hökumətin təqdim etdiyi "Bərabərlik və vətəndaşlıq haqqında” qanun layihəsinə düzəlişi qəbul edib.
Qanun layihəsində xüsusi qeyd olunub ki, "erməni soyqırımı”nı tanımayanları bir il müddətinə azadlıqdan məhrumetmə cəzası və 45 min avro cərimə gözləyir. Doğrudur, qərar hələ parlamentin aşağı palatasında qəbul edilib və Senat bunu ləğv etmək səlahiyyətinə malikdir.
Amma əksər ekspertlər Senatın qanun layihəsini təsdiqləyəcəyini düşünür. Şübhəsiz ki, bu qərarın qəbulu təkcə Türkiyəni deyil, Azərbaycanı da ciddi şəkildə narahat edəcək. Qanun layihəsi ilə bağlı "Şərq”ə açıqlama verən politoloq Qabil Hüseynli bildirib ki, Fransanın yenidən bu qanunu gündəmə gətirməsi Türkiyəyə pislik etməkdən və aranı qarışdırmaqdan başqa bir şey deyil: "Ümumiyyətlə, Fransa hər zaman anti-türk mövqedə dayanan, şovinist millətçiliyi müdafiə edən və radikallığı dəstəkləyən bir dövlət olub. Bu ölkənin islam və türk dünyasına qarşı açıq nifrəti hamıya məlumdur. Fransa heç vaxt tolerant ölkə olmayıb. Qondarma soyqırımı tanımayanların cəzalandırılması haqqında qanun tamamilə biabırçılıq deməkdir. Rusiyada buna cəhd oldu, amma hökumət ağıllı hərəkət edərək qətnaməni gündəmdən qaldırdı. Amma Hollandiya və Belçikada bu cür qanunlar qəbul edilib”. Ekspertə görə, özünü demokratik ölkə kimi təqdim edən dövlətlərdə belə bir qanunun qəbul edilməsi hüquqi dəyərlərə sayğısızlıqdır: "Hər insan düşündüyü kimi danışmaq haqqına sahibdir. Əgər qondarma soyqırımı qəbul edən vətəndaşlara yanaşılırsa, onda bunu inkar edənlərə və faktlarla isbatlayanlara da eyni münasibət olmalıdır. Ancaq təəssüflər olsun ki, bunun əksini görürük”. Q.Hüseynli vurğulayıb ki, insanlara azad və fərqli düşüncəsindən dolayı cəza vermək hüquq adına ləkədir: "Xatırlayırsızsa, Türkiyə İşçi Partiyasının sədri Doğu Perincik Hollandiyada bu məsələni gündəmə gətirdi və erməni qətliamının uydurma olduğunu söylədi. Buna görə hökumət Perinciki iki gün həbsdə saxladı. Həbsdən çıxan partiya sədri Hollandiyanı söz azadlığını məhdudlaşdırmaqdan dolayı Avropa Məhkəməsinə verdi və 6 aydan sonra bəraət aldı. Hollandiya hökuməti isə cəzalandırıldı”.
İsmayıl
