Qoşunların təmas xəttində təxribata cəhd edərkən saxlanılan və Gəncə Ağır Cinayətlər Məhkəməsinin hökmü ilə 15 il azadlıqdan məhrum edilən erməni hərbi qulluqçu Arsen Eduardoviç Baqdasaryan Ermənistanın baş nazirinin səlahiyyətlərini icra edən Nikol Paşinyana müraciət göndərib. Paşinyan isə Baqdasaryanın ünvanladığı əsir-girovların "hamının-hamıya” prinsipi ilə azad edilməsi ilə bağlı müraciətinə biganə yanaşıb və girovların dəyişdirilməsindən imtina edib.
Millət vəkili Hikmət Babaoğlunun fikrincə, Paşinyanın əvvəlki erməni rəhbərliyinin mövqeyindən çıxış edərək əsir və girovların dəyişdirilməsi çağırışına reaksiya verməməsi, Ermənistan üçün müsbət heç nə vəd etmir:
"Hərbi əməliyyatlar zamanı əsir düşən hərbçilərin, girovların dəyişdirilməsi bütün dünyada humanist bir addım kimi qiymətləndirilir.
Ən qəddar savaşlarda belə ilk fürsətdə əsir, girov mübadiləsinə önəm verilir. Bu həm humanitar, həm də müharibənin qanunlarına aiddir. Çox təəssüf ki, işğalçı Ermənistanda baş nazir vəzifəsini icra edən Nikol Paşinyan erməni əsirin girovların "hamının-hamıya” prinsipi ilə azad edilməsinə dair müraciətini qulaqardına vurub, onların dəyişdirilməsindən imtina edib. Onun bu reaksiyası antihumanist addımı bir daha onların öz vətəndaşlarına olan qəddar və biganə münasibətinin göstəricisidir.
O, bu mövqeyi ilə sülh tərəfdarı olmadığını, problemin həlli istiqamətində lazımi addımları atmaq marağında olmadığını açıq şəkildə bəyan etmiş oldu. Hesab edirəm ki, Paşinyanın bu davranışı dünya ictimaiyyəti və erməni əhalisi tərəfindən ciddi şəkildə qınanmalıdır”.
Şəymən
