Azərbaycanda hər il bayramlar ərəfəsində məhbusların əfv olunması ənənə halını alıb. Müxtəlf bayramlarda imzalanan əfv fərmanları ilə yüzlərlə məhbus azadlığa çıxır.
Ona görə, insanlar bu il də Yeni il və Dünya Azərbaycanlılarının Həmrəylik günü ərəfəsində əfv fərmanını gözləyir. Bəs növbəti əfv fərmanı imzalanacaqmı?
Məsələ ilə bağlı "Sherg.az”a danışan hüquq müdafiəçisi Novella Cəfəroğlu əfv olmasını gözlədiyini vurğulayıb. Lakin N.Cəfəroğlu fərmanın olub-olmayacağını dəqiq bilmədiyini də əlavə edib:
"Eşitdiyimizə görə, bu sahədə işlər aparılır. Gözləyirik ki, əfv olacaq”.
Digər hüquq müdafiəçisi Səidə Qocamanlı da əfv olacağını təsdiqləyib. Onun sözlərinə görə, bu sahədə işlər aparılır:
"Daha dəqiq məlumatı sözsüz ki, Azərbaycan Respublikasının Prezidenti yanında Əfv Məsələləri Komissiyası verə bilər. Lakin bayram ərəfəsində yeni əfv fərmanının imzalanması ehtimalı böyükdür”.
Aysel Aslan
