"16 saylı Yasamal II seçki dairəsinin 15 saylı məntəqəsində baş tutan səsvermə prosesində yaşlı nəslin nümayəndələri də aktiv şəkildə iştirak edirlər".
Bu barədə "Sherg.az"-ın əməkdaşına məntəqənin sədri Gülcahan Həsənova məlumat verib. O diqqətə çatdırıb ki, saat 15:30-a qədər seçki məntəqəsinə 750-yə yaxın seçici müraciət edib:
"Məntəqədə qeydiyyatda olan 1237 nəfər seçici arasında yaşlılar və gənclər də var. Yaşlı nəslin nümayəndələri səhər saat 07:00-dan etibarən məntəqənin qarşısında olublar. Onlar seçkilərin həmin saatda başladığını zənn ediblər. Məntəqə saat 08:00-dan etibarən açıldı, Azərbaycanın Dövlət Himni səsləndikdən sonra həmin seçicilər ilk olaraq səsvermədə iştirak etdilər".
Məntəqə sədrinin sözlərinə görə, seçki prosesini GUAM Parlament Assambleyasının nümayəndələri, Gürcüstan, Rusiya, Qazaxıstan və Türkiyədən gələn müşahidəçilər izləyib. Və səsvermə prosesindən tam razı qalıblar.
Səyyar seçki qutularının evlərə göndərilməsinə gəlincə, G. Həsənova onlara bu barədə müraciət edilmədiyini söyləyib:"Səyyar seçki qutularının evlərə göndərilməsi üçün bir sutka əvvəldən seçicilərimiz müraciət etməli idi. Ötən gün bizə müraciət edən seçicimiz olmayıb. Ona görə, hazırda səyyar seçki qutularımız yoxdur".
Qeyd edək ki, vətəndaşlar bu gün axşam 20:00-a qədər qeydiyyatda olduqları seçki məntəqələrinə gələrək seçkilərdə iştirak edə bilərlər.
Aysel Aslan
