"Azərbaycan Ordusu qarşısına qoyduğu məqsədə artıqlaması ilə nail oldu”. Bunu aprelin 2-dən 5-nə kimi cəbhədə baş verən olaylarla bağlı "Şərq”ə danışan Qarabağ qazisi, "Boz qurd” batalyonunun komandiri Nurəddin Xoca deyib. Keçmiş döyüşçü bu anı çoxdan gözlədiklərini bildirib:
"23 ildir dözürdük, səbrimiz bir gün mütləq partlamalı idi. İndi situasiya elə gətirdi ki, beynəlxalq proseslərlə bizim istəyimiz üst-üstə düşdü. 3 gün ərzində Azərbaycanın güclü ordusunun nəyə qadir olduğunu hamıya göstərdik”. Qazi ölkə əhalisinin savaş ruhunun çox yüksək olduğunu da söyləyib: "Əslində belə də olmalıdır, millətimiz zəfərə ac idi, qələbə qazanmağa susamışdı. Qalibiyyəti görən xalqın önünü heç kim kəsə bilməz. Ümumiyyətlə, türk milləti savaşçı ruhludur. Bu xalq başıaşağı gəzmək istəmədiyini, torpaqlarının düşmən əlində qalmasına dözmədiyini təsdiqlədi. Əsas məsələ odur ki, illərlə bizə sırınmış "ay aman, ermənilərin arxasında rus ordusu var, nə bilim, Sərkisyanın müdafiəsi güclüdür” və s. kimi mifik söz-söhbət əsgərlərimiz tərəfindən darmadağın edildi. Məqsədyönlü şəkildə aparılan təbliğatı yerə sərdik. Sübut etdik ki, ən güclü qoşunların standartlarına malikik, güclüyük, ağıllıyıq və qorxmazıq. Əgər kənardan "barmaq” olmasa, Azərbaycanın cəsur əsgərlərinin qarşısında heç bir düşmən qüvvəsi dayana bilməz. Çünki xalqımız öz torpağı, namusu uğrunda vuruşan və canından keçməyi bacaran ən şərəfli millətlərdəndir. Biz döyüşməyi və qalib gəlməyi bacarırıq”. N.Xoca deyib ki, biz hər zaman sülh tərəfdarı olmuşuq, atəşkəsi qorumuşuq: "Amma ermənilər ömür boyu biqeyrət olublar. Biqeyrət toplumdan sülhə, sazişə sadiqlik gözləmək əbəsdir. Əgər ermənilər bizimlə birgə yaşamaq istəyirlərsə, qanunlarımıza uysunlar, yox əgər istəmirlərsə, onda cənab Ali Baş Komandanın da dediyi kimi, rədd olub torpaqlarımızdan getsinlər”.
İsmayıl
