Gürcüstan hökuməti vətəndaşlıq almaq istəyən xarici vətəndaşlar üçün şərtləri sərtləşdirməyi qərara alıb. Bununla əlaqədar olaraq "Əcnəbilərin hüquqi vəziyyəti və vətəndaşlığı olmayan şəxslər haqqında” qanuna dəyişikliklər olunacaq. Deyilənə görə, "Vahid Milli Hərəkat” Partiyasının hazırladığı qanun layihəsi Gürcüstan parlamentinin siyasi iqtisadiyyat komitəsində birinci oxunuşda müzakirə olunub və dəstəklənib.
Qanuna təklif olunan dəyişikliklərə əsasən, ölkədə iş icazəsi və daimi yaşayış yerinin əldə edilməsi, habelə qeyri-qanuni miqrasiyaya aid şərtlərin sərtləşdirilməsi nəzərdə tutulur. Parlamentdən bildiriblər ki, qanun layihəsi qəbul edildikdən sonra Gürcüstanda 6 il müddətinə müvəqqəti yaşayışa verilmiş icazə daimi yaşayış üçün kifayət etməyəcək. Əlavə tələblər olaraq əcnəbilərin dövlət dilini bilməsi zəruri hesab ediləcək. Həmçinin, əcnəbilər Gürcüstana 200 min ABŞ dolları həcmində investisiya yatırmalı və ya əcnəbilərin əmlakı olmalıdır.
Məsələni "Şərq”ə dəyərləndirən "Konstitusiya” Araşdırmalar Fondunun eksperti, hüquqşünas Zaur İbrahimli deyib ki, Gürcüstanda 2013-cü ildə baş tutan "məxməri inqilab”dan sonra prezident Saakaşvilinin təşəbbüsü ilə faktiki olaraq, "açıq qapılar” siyasəti yürüdülürdü. Bu siyasətin əsas qayəsi, ölkəyə daha çox investor, kapital və turist cəlb etmək idi:
"Saakaşvili komandası Gürcüstanda güzəştli biznes qurulması, investisiya qoyulması üçün çox güzəştlər tətbiq edirdilər. Eyni zamanda Gürcüstan birtərəfli qaydada mümkün qədər çox ölkə ilə viza sistemini ləğv edirdi. Ölkədə müvəqqəti və ya daimi yaşamaq və vətəndaşlıq almaq şərtləri də çox yumşaldıldı. Gömrük və sərhəd-keçid proseduru maksimum sadələşdirildi”.
Ekspert bildirib ki, Gürcüstanın Avropa İttifaqı ilə vizasız gediş-gəliş sazişi imzalanmasından sonra Brüsselin təkidi ilə prosedurların yenidən nəzərdən keçirilməsinə başlanılıb:
"Avropa İttifaqı ölkələrinə vizasız getmək hüququ Gürcüstan vətəndaşlığı almaq istəyənlərin sayını artırıb. Avropa İttifaqı bunu problem kimi dəyərləndirib. Digər məqam isə ölkə daxilində bir çox əcnəbilərin müxtəlif yollarla vətəndaşlıq alaraq əmlak, torpaq mülkiyyətçisi olması ilə bağlıdır. Xüsusən, ərəb ölkələrindən iş adamlarının buna can atması narahatlıq yaradıb. Narahatlıq onunla bağlıdır ki, bu şəxslər investor kimi deyil, tamamən fərqli və başqa məqsədlərlə Gürcüstan vətəndaşlığı almağa çalışırlar. Qeyd etdiyimiz kimi, həm Avropa İttifaqının tövsiyələri, həm də təhlükəsizlik amili bu məsələlərə yenidən baxılmasını şərtləndirib”.
İsmayıl
