Güzəştli mənzillərin onlayn satışı başa çatıb. Onlayn sistemdə hər hansı bir problemin yaşanmadığı bildirilir. Satış zamanı 154 mənzilin seçimində iştirak edənlərin sayı 4.624 nəfər olub. Bu isə güzəştli mənzillərə vətəndaşların tələbatının və marağının yüksək olduğunun göstəricisidir.
Məlumata görə satışda ilk seçim 4-5 saniyə çəkib. 38-40 saniyə ərzində isə bütün mənzil seçimi başa çatıb. Təbii ki, onlayn satış ən şəffaf və insan müdaxiləsinə imkan verməyən uğurlu variantdır.
40 saniyədə bütün mənzil satışının həyata keçirməsinin mümkün olduğunu deyən daşınmaz əmlak üzrə ekspert Nüsrət İbrahimov "Sherg.az”a bildirib ki, bu dəfəki satış zamanı mənzillərin sayı da az olub:
"Sonuncu dəfə 154 mənzil təqdim olunub. Artıq insanlar onlayn satışlarda müəyyən qədər təcrübə toplayıblar. Onlar bilirlər ki, mənzili tez əldə etmək üçün necə hərəkət etmək lazımdır. Eyni zamanda onlayn sistem əvvəlkilərdən fərqli olaraq xeyli təkmilləşdirilib.
Əvvəllər 10 nəfər eyni vaxtda düyməni basanda sistemdə pozuntu qeydə alınırdı. Lakin indi bir dəfəyə 100 nəfər düyməni sıxanda problem yaranmır. Bu kimi hallar imkan verir ki, qısa zamanda sosial mənzillərin satışı həyata keçirilsin”.
Yeganə Bayramova
