Son illər bütün dünyanı narahat edən problemlərdən biri də qlobal istiləşmədir. Xüsusilə, bu il yay aylarında bir çox ölkələri bürüyən anomal istilər qlobal istiləşmə problemini yenidən bütün dünyanın diqqət mərkəzinə gətirdi.
Müşahidə olunan anomal istilərin səbəblərini izah edən Ekologiya və Təbii Sərvətlər Nazirliyinin Təbliğat Şöbəsinin müdiri İsa Əliyev "Sherg.az”a açıqlamasında maraqlı məqamlara toxunub. Ekspert bildirib ki, hər bir insanın gündəlik təsərrüfat fəaliyyətində, işlərində atmosferə müxtəlif qazlar atılır:
"Nəticədə atmosferi çirkləndirən qazlar Günəşdən gələn şüaları sərbəst yerə buraxır, yerdən əks olunan şüaları isə tutub, özündə saxlayır. Ona görə, yaşadığımız planet nisbətən qızmağa bağlayır. Yerin istilik maşını Günəşdir. Planetimizə nə qədər günəş enerjisi gələrsə, onun 99 faizi kosmosa qayıdır. Müxtəlif yanacaqlardan istifadə, sənaye tullantıları, ozon qatının deşilməsi nəticəsində Yerə daxil olan enerji daxildə qalır. Hazırda dünyada demək olar, bir nömrəli problem qlobal istiləşmədir”.
Qlobal istiləşmənin qarşısını almaq, bunun fəsadlarından qorunmaq yollarını izah edən İ. Əliyev deyib ki, böyük dövlətlər ekoloji layihələr hazırlayıb, dünya birliyinə nümayiş etdirməlidir:
"Yalnız bir ölkənin addım atması ilə problem həll edilə bilməz. Bu qlobal məsələdir. Geniş meşələr salınmalı, zərərli qazların atmosferə ötürülməsinin qarşısı alınmalıdır. Xüsusilə iri ölkələr – Amerika, Rusiya, Çin, Hindistan kimi böyük dövlətlər birlikdə addım atarsa, çirklənmənin qarşısı alınar”.
Aysel Aslan
