"Azərbaycan "Formula 1” kimi çox önəmli və dünyanın diqqətini cəlb edən yarışlar ərəfəsindədir. Yəni hamının diqqəti Azərbaycanın üzərindədir”.
Bunu "Sherg.az”a açıqlamasında siyasi ekspert Azər Həsrət deyib.
Ekspert vurğulayıb ki, beynəlxalq oyun arasında ölkəmizdə neqativ, pozitiv nə baş versə, diqqət cəlb edəcək:
"Bu məqamı nəzərə alan bəzi adamlar köhnə şəkilləri paylaşaraq təbliğat qururlar. Onların məqsədi ictimai rəyi çaşdırmaq və Azərbaycana beynəlxalq təzyiq göstərilməsinə nail olmaqdır. Sosial şəbəkələrdə yazırlar ki, UNESKO tərəfindən qorunan divarları guya söküb-dağıdırlar. Ancaq sonra "İçərişəhər” Dövlət Tarix-Memarlıq Qoruğu İdarəsi video-görüntü yaydı və bəlli oldu ki, orada sadəcə bərpa işləri aparılıb. Yayılan fotolar da 2012-ci ilə aiddir. Hazırda qala divarı normaldır və heç bir problem yoxdur”.
A.Həsrətin sözlərinə görə, məqsəd "Formula 1” ərəfəsində Azərbaycanın adını qara siyahılara saldırmaqdır:
"Amma burada bir məqam var. Məsələ ondadır ki, dünəndən həmin görüntülər paylaşılır, ancaq "İçərişəhər” DTMQİ-si çevik davrana bilmir. Mən özüm əvvəlcə o şəkilləri görəndə əsəbləşdim ki, niyə bunu edirlər?! Təəssüflər olsun ki, Qoruq İdarəsi bir gün sonra həqiqəti əks etdirən fotoları yayımladı. Bu da onu göstərir ki, bəzən müvafiq dövlət qurumları operativ hərəkət edə bilmirlər. Nəticədə ictimaiyyətdə ajiotaj yaranır. İstərdim ki, bu cür məsələlər baş verəndə dövlət qurumları məsuliyyətini anlasın və dərhal ictimaiyyətə açıqlama versin. Fotolar paylaşılan kimi dərhal jurnalistləri həmin yerə dəvət etmək olardı. Amma bunun əvəzinə sosial şəbəkədə tənqid yazanları bloklamağı üstün tutdular. Halbuki ətraflı və dərhal izah etmək daha məqsədəuyğun olardı”.
İsmayıl
