Cəlilabad rayon icra başçısı xəstə ananı və balasını gölməçələrdə yaşadır. Ruslan Hüseynov artıq 25 ildir ki, anası ilə Cəlilabadın Göytəpə şəhərindəki xəstəxana binasına sığınıb.
Bu 25 il ərzində Cəlilabad bir neçə icra başçısı görüb, amma R.Hüseynovla ağır xəstə olan anasına onların heç biri əl tutmayıb, normal bir evlə təmin etməyiblər. R.Hüseynovun sözlərinə görə, rayonun icra başçısı Namiq Zeynalova etdiyi müraciətlərə baxmayaraq, Cəlilabadın rəhbəri ona laqeyd yanaşıb:
"Bu vəziyyətdə kim yaşayar? Bakıda günü 10 manata işləyirəm, o da anamın dərmanlarına gedir. Özü də 130 manat pensiya alır, heç yeməyə çatmır.
Evdə qaz yoxdur, odundan istifadə edirik. Yatmağa belə yerimiz yoxdur. Heç kim bizə kömək etmir. Mən Namiq Zeynalova yaxınlaşmışdım, dedi ki, təzə gəlmişəm, sonra baxarıq. Bir müddət keçdi, yanına getdim, dedim gəlib gözlərinizlə şahid olun ki, nə gündə yaşayırıq. Dedi ki, gələ bilmirəm, bizim fondumuz yoxdur, kömək edə bilmərik. Bizim bu yaşayımıza baxın, ev uçur, dağılır, kim mənə ailə qurmaq üçün qızını verər?”.
Cəmiyyətimizdə sosial məsuliyyət və insanların bir-birinə yardım göstərməsi ilə bağlı xeyli biganəlik olduğunu deyən "Konstitusiya” Araşdırmalar Fondunun prezidenti Əliməmməd Nuriyev "Sherg.az”a bildirib ki, xüsusilə bələdiyyələr çətin durumda olan vətəndaşlara yardım etməlidir:
"Son aylarda bu tipli müraciətlərin sayı çoxalıb. Çünki ölkə başçısı tərəfindən sosial müdafiə sisteminin gücləndirilməsi ilə bağlı çoxlu sayda fərman və sərəncamlar imzalanır. Əslində rayon yerində yaşayan hər kəsin pis şəraiti olsa belə, bir yuvası var. Lakin bütün hallarda vətəndaş çətin vəziyyətdə yaşayırsa, şübhəsiz ki, müvafiq qurumlar bu istiqamətdə tədbirlər görməlidir.
Xüsusilə bələdiyyələr, icra hakimiyyətləri vətəndaşlara kömək olmalıdır. Fikrimcə, bələdiyyələr, həmin vətəndaş üçün kiçik torpaq sahəsi ayıra bilərlər. Yerli özəl qurumlar da bu məsələdə öz dəstəklərini göstərməlidir.
Təəssüf ki, Azərbaycanda paylaşma anlayışı yoxdur. Cəmiyyətimizdə bu ənənələr yavaş-yavaş itir. Əvvəllər hər kəs yığışıb köməksiz vəziyyətdə olanlara şərait qururdu. Göytəpə qəsəbəsində də belə şərait yaratmaq olardı. Oradakı insanların fermer təsərrüfatları da yaxşı durumdadır. Bu baxımdan yerli icra hakimiyyətləri məsələyə həssas yanaşmalıdır. İcra hakimiyyətinin öz büdcəsi yoxdursa, heç olmasa müxtəlif sahibkarlara müraciətlər olunmalıdır”.
Ə. Nuriyev vətəndaşın normal işlə təmin edilməsinə də ehtiyac olduğunu bildirdi:
"Məşğulluq idarəsi bu məsələ ilə bağlı tədbir görə bilər. Vətəndaşın normal gəlir mənbəsi olarsa, problemləri həll etmək mümkündür. Vətəndaşa yardım etmək üçün uzun müddət vəzifədə olmaq lazım deyil.
Əminəm ki, Cəlilabadda Allaha inanan insanlar çoxdur. Göytəpə sakinləri bu olanlara biganə qalmamalıdır. Biz adətən hər şeyi dövlətdən gözləyirik. Amma cəmiyyət üzvləri də belə proseslər zamanı imkan daxilində öz köməkliklərini göstərməlidir”.
Yeganə Bayramova
