Gürcüstanın paytaxtı Tiflisdə keçirilən karate üzrə Dünya Çempionatında Azərbaycan və Ermənistan idmançıları arasında düşən davanın bəzi təfərrüatları məlum olub.
Azərbaycan Şotokan-Karate Birliyinin vitse-prezidenti Renat Əliyev "Şərq”ə açıqlamasında bildirib ki, Turqut Həsənov bir gün sonra Tiflisə gələrək yarışlara qatılıb: "Hadisə mayın 2-də baş verib. O isə ayın 3-də ora gəlib. Dava olan vaxtı Turqut orada olmayıb”.
R.Əliyevin sözlərinə görə, adıçəkilən idmançı böyüklərdən ibarət olan yığmanın tərkibində çıxış edir: "Bu hadisə isə gənclərdən ibarət komandanın üzvü yarışanda baş verib. İnformasiyada niyə onun adı hallanıb, bilmirəm”.
Vitse-prezident insidentin necə baş verməsinə də aydınlıq gətirib: "Bu hadisə baş verən zaman bizim idmançı erməni ilə yox, gürcü karateçisi ilə döyüşürdü. Ancaq qarşı tərəfin - erməni əsilli Gürcüstan vətəndaşı olan məşqçisinin müdaxiləsindən sonra yüngülvari insident baş verib. Lakin sonradan hüquq-mühafizə orqanları, bizim məşqçilər və tamaşaçılar tərəfindən həmin insan yarış keçirilən zaldan çıxarılıb. Həmçinin o və tələbəsi 1 il müddətinə keçirilən yarışlardan diskalifikasiya edilib”.
Qeyd edək ki, mətbutada yayılan məlumatlara əsasən hadisənin gənc idmançı Turqut Həsənovun tatamidə döyüşdüyü vaxt baş verdiyi bildirilirdi.
Vüqar Şahinoğlu
