"Biz Dağlıq Qarabağ münaqişəsini dövlət olaraq özümüz həll etməliyik. Tehrandan və Moskvadan müsbət addım gözləmək lazım deyil”.
Bunu Sherg.az-a iranlı musiqiçi Meysam Hodratın Azərbaycanın işğal olunmuş Dağlıq Qarabağ bölgəsində konsert verməsinə münasibət bildirən Klassik Xalq Cəbhəsi Partiyasının sədri Mirmahmud Mirəlioğlu deyib.
O bildirib ki, İranın ermənipərəst mövqeyi bu cür arzuolunmaz halların yaşanmasına şərait yaradır:
"Bir müddət öncə həm İrəvan, həm də Tehran tərəfindən açıqlama səsləndi ki, farslarla ermənilərin əcdadları eynidir. Onlar bunu rəsmi şəkildə bəyan etdilər.
İran daim Ermənistanın yanındadır. Bu dövlətə həmişə iqtisadi, siyasi dəstək olur, lazım olanda hətta "süni nəfəs” də verir. Son hadisə isə İranın təşkil etdiyi bir qədər mədəni təxribat kampaniyasıdır. Bu onların xislətindən irəli gələn məsələdir.
Mədəniyyət və Turizm Nazirliyinin bu problemlə bağlı açıqlaması normal qəbul olunmalıdır. Lakin biz özümüz torpaqlarımızı işğaldan azad etməli, zəfər bayramına isə hansı musiqiçini dəvət edəcəyimizə qərar verməliyik. Bunu edə bilmiriksə, digər dövlətlərin addımlarına münasibətimiz də söz olaraq qalacaq. Qələbəni təmin edərək, Xankəndinə getməli, orada qonaqlarımızı qəbul etməliyik. Bunları etmədikcə, nazirliyinin münasibəti də hər hansı bir təşkilatın, qurumun münasibəti biçimində qalacaq. Bu elə ciddi problemlərdir ki, münasibət bildirməklə yanaşı həm də konkret fəaliyyət göstərmək lazımdır”.
Qeyd edək ki, Mədəniyyət və turizm naziri Əbülfəs Qarayev iranlı musiqiçi Meysam Hodratın Azərbaycanın işğal olunmuş Dağlıq Qarabağ bölgəsində konsert verməsinə münasibət bildirib. Nazir deyib ki, bununla bağlı müvafiq dövlət orqanları adından etiraz məktub ünvanlanıb.
Xatırladaq ki, Meysam Hodratın Dağlıq Qarabağda konserti martın 27-də baş tutub. Konsertdə onunla bərabər İrandan gələn fleytaçı, Meysam Hodratın erməni həmkarı Artaşes Qriqoryan və pinoçu Marina Barxudaryan da iştirak edib.
Aysel Aslan
