"İran və İsrail arasında gedən mübarizə mənfi sonluqla nəticələnməli idi”.
Bunu "Sherg.az”a İsrail-İran gərginliyinin nəticələri haqqında danışarkən analitik Arzu Nağıyev deyib.
O bildirib ki, Suriya məsələsində İran və İsrailin – hər birinin fərqli mövqeyi var:
"İran hər dəfə öz bəyənatlarında İsrail və Amerika Birləşmiş Ştatlarını (ABŞ) məhv edəcəyini səsləndirirdi. ABŞ-ın İrana qarşı tətbiq etdiyi sanksiyalar, İsrailin İran ordusuna zərbələr endirməsi üst-üstə düşən haldır.
Üstəlik, İsrailin baş naziri Benyamin Netanyahu Rusiya ilə danışıqlar apararkən bir növ bu dövlətə xəbərdarlıq edirdi. Çünki İranın məqsədi dənizdən-dənizə olan bütün əraziləri şiə dövlətinə çevirmək, dini məzhəbdən istifadə edərək öz istəyinə çatmaqdır.
Müsəlman dövlətləri isə İranla həmrəy deyil. Bu dövlətlər anlayır ki, İranla İsrail arasında hər hansı bir müharibə başlansa, bu, bütün regionu əhatə edəcək. Nəticə çox böyük müharibəyə gətirib çıxaracaq”.
Qeyd edək ki, ABŞ-ın İranla nüvə sazişindən imtina etməsindən sonra İsrail və İran qüvvələri bir-birinə hücum edib. Suriya torpaqlarından İsrailə atılan raketlərə rəsmi Təl-Əviv qisasla cavab verib.
Aysel Aslan
