"Şadlıq evləri və restoranlarda işləyənlərin əksəriyyəti əmək müqaviləsi olmadan fəaliyyət göstərir”.
Bunu "Sherg.az”a məhərrəmlik ayında şadlıq evlərində çalışan işçilərin əksəriyyətinin işsiz qalmasından danışarkən iqtisadçı-ekspert Natiq Cəfərli deyib.
O bildirib ki, belə restoranlarda rəhbərlik istəyəndə istənilən şəxsi işdən çıxara bilir:
"Bu zaman heç bir qanun pozuntusu baş vermir. Əmək müqaviləsi olmadığına görə, rəhbərliyin burada məsuliyyəti olmur. Əmək müqaviləsinin bağlanması ən çox pozulan sahələrdən bir də məhz şadlıq evləri, restoranlardır.
Əgər əmək müqaviləsi bağlanarsa, buna uyğun işçilərin qəbulu baş verərsə, hüquqi cəhətdən sabit maaş təsbit edilə bilər. Bununla da işçinin fəaliyyətdə olub-olmamasından asılı olmadan normal maaş ödənilər. Bu mənada əmək müqaviləsinin bağlanması vacibdir. Əmək müqaviləsinin bağlanması ilə çalışanların toy olmayan aylarda maaş almasının qarantisi yaranır.
Hazırda əsas problem hüquqi müstəvidə əmək müqavilələrinin bağlanmasıdır. Gizli iş yerlərinin olması istisna deyil. İlk növbədə sabit maaş məsələsini həmin müəssisələrdə tətbiq etsələr, problem həllini tapar”.
Aysel Aslan
