"Rusiya rəhbərliyi jurnalist Orxan Camalın və atası, mərhum Heydər Camalın fikirlərindən narahat olurdu”.
Bunu "Sherg.az”a Mərkəzi Afrikada həlak olan azərbaycanlı jurnalist Orxan Camalın dəfn edilməsi ilə bağlı yaranan problemin səbəblərini izah edərkən "Atlas" Araşdırmalar Mərkəzinin sədri, politoloq Elxan Şahinoğlu söyləyib.
O diqqətə çatdırıb ki, hər iki şəxs Dağlıq Qarabağ münaqişəsi və digər problemlərlə bağlı fikirlərini ifadə edir, Rusiya Federasiyasının haqlı olmadığı məqamları vurğulayırdılar:
"Həm Orxan Camal, həm də Heydər Camal Dağlıq Qarabağ münaqişəsində Azərbaycanın haqlı olduğu məqamları diqqətə çatdırırdılar. Bu isə Rusiyanın mənafeyinə uyğun deyildi.
Orxan Camalın Mərkəzi Afrikaya getməsinin səbəbi də çox maraqlıdır. O, Rusiyanın silahlı muzdlularının hansısa silahlı qruplaşma ilə əlbir olub, qarşı tərəfə savaş açması barədə məlumatları araşdırmağa yollandı. Onun və bir neçə jurnalistin qətlə yetirilməsi ilə bağlı mübahisəli məqamlar buna görə baş qaldırdı. İndi isə Orxan Camalın dəfn edilməsində yaranan anlaşılmazlıq Rusiyanın jurnalistə neqativ münasibətini daha da önə çəkdi.
Düşünürəm ki, jurnalistin dəfn edilməsi ilə bağlı məsələ bu günlərdə həll olunacaq. Çünki artıq Orxan Camal dünyasını dəyişib, bu prosesi uzatmaq olmaz. Amma Rusiya hakimiyyəti bu məsələni ört-basdır etmək istəyir. Ona görə ki, jurnalistlərin araşdırması üzə çıxsa idi, dəhşətli faktlar məlum ola bilərdi. Buna görə, qətl baş verdi və xeyli qaranlıq məqamlar qaldı”.
Qeyd edək ki, Mərkəzi Afrikada həlak olmuş jurnalist Orxan Camalın qohumlarına Mərkəzi Afrika Respublikasında onun ölümü haqda Rusiya Federasiyasının konsulu tərəfindən imzalanmış yekun rəy itirildiyi deyilib. Mərhumun dostu və həmkarı Maksim Şevçenko bildirib ki, bu sənəd olmadan O.Camalı dəfn etmək olmaz.
Aysel Aslan
