"Öz istiqamətlərini qətiyyətlə müəyyənləşdirən şəxslər Jurnalistika üzrə qəbul imtahanlarında iştirak ediblər”.
Bunu "Sherg.az”a "Jurnalistika”ya qəbul imtahanlarında iştirak etmək hüququ qazanmış 446 abituriyentdən 104 nəfərin imtahana gəlməməsinin səbəblərini izah edərkən "Xalq Cəbhəsi” qəzetinin baş redaktoru Elçin Mirzəbəyli deyib.
Onun sözlərinə görə, qabiliyyət imtahanlarında iştirak etməyən, son anda fikrini dəyişən abituriyentlər alternativ ixtisaslara müraciət ediblər:
""Jurnalistika”nı alternativ kimi ehtiyatda tutan abituriyentlər də var. Tək bu ixtisası deyil, digər bir neçə ixtisası da nəzərdə saxlayıb, birini seçirlər. Bu, normaldır.Son illərdə "Jurnalistika”ya marağın azaldığını deyə bilmərəm. Əslində bu qədər abituriyentin müraciət etməsi, jurnalist olmaq istəməsi də müsbət qiymətləndirilməlidir. Mən deyərdim ki, son vaxtlar Jurnalistikaya müraciət edənlərin sayı artır. Üstəlik, bu ixtisası seçənlər arasında 600-dən yüksək bal toplayanlar da var. Bütün bu rəqəmlər müsbət tendensiyadan xəbər verir”.
Qeyd edək ki, Dövlət İmtahan Mərkəzi (DİM) 2018/2019-cu tədris ili üçün ali təhsil müəssisələrinin bakalavriat səviyyəsinin "Jurnalistika” ixtisasına qəbul olmaq istəyən abituriyentlər üçün avqustun 6-da keçirilən qabiliyyət imtahanının nəticələrini elan edib.
Bildirilib ki, imtahanda iştirak etmək hüququ qazanmış 446 abituriyentdən 104 nəfəri imtahana gəlməyib. İştirak edən 342 abituriyentdən 287 nəfəri isə "məqbul” qiymət alıb.
Aysel Aslan
