"2018-ci ilin birinci yarısının nəticələri, ölkənin iqtisadi inkişaf göstəriciləri müsbətdir”.
Bu sözləri "Sherg.az”a 2018-ci ilin ilk 6 ayının göstəricilərinə görə, Azərbaycanın iqtisadi inkişafını dəyərləndirərkən iqtisadçı, millət vəkili Vahid Əhmədov söyləyib.
O qeyd edib ki, bu müddət ərzində Azərbaycanda ümumdaxili məhsulda 2 faizdən çox artım var:
"Bununla paralel olaraq, qeyri-neft sektorunda da inkişaf nəzərə çarpır. Azərbaycana investisiya yatırımı bu il də müsbət şəkildə irəlilədi. Valyuta ehtiyatları artıb, inflyasiya isə azalmağa başlayıb.
Ölkə başçısının qeyd etdiyi məsələlər sırasında bəzi nöqsanların diqqətə çatdırılması da müşahidə olundu. Bakı şəhərinin İcra Hakimiyyəti, paytaxtın rayonlarının icra hakimiyyəti tikinti ilə əlaqədar yol verdiyi nöqsanlarla əlaqədar xəbərdarlıq edildi. Bu proses artıq Dövlət Arxitektura Komitəsi tərəfindən həyata keçiriləcək, vahid nəzarət olunacaq. Bu, çox ciddi məsələdir”.
V.Əhmədov ölkə başçısının tənqid etdiyi məsələlər sırasında korrupsiya və rüşvətxorluq hallarının olduğunu da diqqətə çatdırıb. Deputat bildirib ki, prezidentin qeyd etdiyi kimi bu məsələ ciddi nəzarətdə saxlanacaq:
"Bu sahəyə diqqətin yüksək olması korrupsiya və rüşvətxorluqla mübarizə aparılması əhalinin rahatlığı üçün də müsbətdir.
Bir neçə gün əvvəl Mingəçevir İES-də baş verən qəza hadisəsi də Prezident İlham Əliyevin iclas gündəliyində mühüm yer aldı. Ölkə başçısı qeyd etdi ki, bununla bağlı komissiya yaradılıb və araşdırmaların yekunları barədə məlumat veriləcək. Bu məsələdə günahı olmayan şəxsləri cəzalandıracaq deyilik. Yalnız bu hadisədə məsuliyyətli olan, nöqsana yol verən səlahiyyətlilər cəza tədbirlərinə məruz qalacaq.
Ermənistan-Azərbaycan Dağlıq Qarabağ münaqişəsinə gəlincə, Prezident yeni erməni rəhbərliyinə çox mühüm mesajlar ünvanladı. O bildirdi ki, münaqişə qısa müddətdə həll olunmasa, Ermənistan bundan sonra da beynəlxalq layihələrdən kənarda qalacaq və çökməkdə davam edəcək.
İlham Əliyev müxtəlif sahələrdə kadr və struktur islahatlarının davam etdiyini də xüsusi vurğuladı. Prezident bildirdi ki, Azərbaycan üçün önəmli olan bütün sahələrə diqqət ayrılır və bu hər zaman belə olacaq”.
Qeyd edək ki, iclasda çıxış edən Prezident İlham Əliyev diqqətə çatdırıb ki, Azərbaycanın beynəlxalq nəqliyyat və logistika mərkəzinə çevrilir:
"Xüsusilə, Cənub Qaz Dəhlizinin açılışı tarixi hadisədir. 2018-ci ilin əvvəlində qarşımıza qoyduğumuz bütün vəzifələrə növbəti dövrdə uğurla nail olacağıq. Bundan sonrakı illərdə Azərbaycan iqtisadiyyatı dinamik şəkildə inkişaf etməlidir. Son illər ərzində apardığımız islahatlar isə öz gözəl bəhrəsini vermişdir. Həmçinin, iqtisadi və maliyyə sektorlarında şəffaflıq da imkan verəcək ki, Azərbaycan iqtisadiyyatı daha inamla inkişaf etsin”.
Aysel Aslan
