"Biz hələ də bank mədəniyyətini ölkəmizə gətirə bilməmişik”.
Bunu Sherg.az-a banklarda kredit faizlərinin yüksək olmasının səbəblərindən danışarkən iqtisadçı, ekspert Fuad İbrahimov deyib.
Onun sözlərinə görə, burada kiminsə mədəniyyətsiz olmasından deyil, biznes və bank mədəniyyətinin olmamasından söhbət gedir:
"Baxışlarımızı müəyyən edə bilməmişik. Bunların hamısı da maliyyə sahəsində olan boşluqlardır. Sanki hər kəs gözləyir ki, ölkə başçısı bununla bağlı konkret göstəriş versin. Tənzimləmə qaydalarını ölkə rəhbərliyi müəyyən etsin. Banklar da bunu əsas götürüb işləsinlər. Amma bu, belə olmamalıdır. Hər dövrə uyğun bu proseslər sivil yolla təkmilləşməlidir. Bu proses bizdə sovetlər dövrünün sonunda necə qalmışdısa, elə davam edir. Bankların yanaşması budur ki, kreditimi verib, faizimi alım. Bank bilməlidir ki, 30 faizlə verilən kredit həmin kreditin qaytarılmayacağı deməkdir. Bu krediti götürən insan gərək qurduğu biznes üzərindən ən azı 35-40 faiz gəlir əldə etməlidir ki, həm krediti bağlasın. Həm də gördüyü işə mənfəət əldə etsin.
Hazırda banklarda mövcud olan faizlər indiki vəziyyətlə uzlaşmayan faiz dərəcələridir. Sahibkarlığın inkişaf etdirilməsini istəyiriksə, mütləq şəkildə kredit faizlərini normal, sivil qaydalarla, illik 3-4 faizlə qaydasına qoysaq, avtomatik şəkildə bütün sahələrdə inkişaf bərqərar olacaq. Bazar artıq özü-özünü tənzimləməyə başlayacaq, iş yerləri açılacaq, inkişaf başlayacaq. Bu məsələdə bizdə bank mədəniyyətinin olmamağı, bank qabiliyyətsizliyi iqtisadiyyatın inkişafına da maneə törədir. Digər ölkələrdəki faiz dərəcələri bank sistemində tətbiq olunmadığı müddətdə bizim iqtisadiyyatın çox şaxəliliyinin inkişafını sürətlənməsindən söhbət getməyəcək”.
Qeyd edək ki, Yeni Azərbaycan Partiyasının sədr müavini-İcra katibi Əli Əhmədovun sözlərinə görə insanları narahat edən yüksək kredit faizləri ilə bağlı Azərbaycan hökumətinin ciddi çalışmaları var.
Aysel Aslan
