Ötən günlərdə ABŞ-ın Federal Ehtiyatlar Sisteminin (FES) iki günlük iclasına yekun vurulub. İclasın yekunlarına dair protokolda qeyd edilib ki, qurum uçot dərəcəsini dəyişməyib və onu 0.5 faizdə saxlayıb. Bu qərardan sonra dollar sürətlə ucuzlaşmağa başlayıb və paralel olaraq neftin qiymətinin qalxdığı müşahidə olunur.
Məlumat üçün bildirək ki, ötən ilin dekabrın 16-da FES uçot dərəcəsinin baza faiz dərəcəsini illik 0-0,25 faiz rekord aşağı səviyyə ilə 0,25 faiz artırıb. Baza faiz dərəcəsi üzrə orta göstərici 0,375 faiz təşkil edir.
Maraqlıdır, görəsən, FES-in qərarı manata necə, təsir edəcəkmi?
Sualımızı cavablandıran iqtisadçı-ekspert Vüqar Bayramov "Şərq”ə söyləyib ki, FES-in uçot dərəcəsini dəyişməyəcəyi öncədən proqnozlaşdırılırdı, bu baxımdan qərar gözlənilən idi.
Ekspertin qənaətincə, FES-in uçot dərəcəsi ilə bağlı son qərarı manata təsir göstərməyəcək: "İndiki məqamda uçot dərəcəsinin stabil qalması bazardakı mövcud status-kvonun qorunub saxlanması deməkdir. Mərkəzi Bank Azərbaycanda valyuta bazarında yenə də aparıcı qurumdur və proseslərə təsir göstərir. Bu baxımdan FES-in qərarı Azərbaycan maliyyə bazarına ciddi təsir göstərməyəcək. Manatın məzənnəsi ölkəyə daxil olan valyutanın həcmindən asılıdır. Azərbaycana dünya bazarında neftin qiymətinin dəyişməsi, FES-in qərarlarından daha çox təsir edir”.
V.Bayramov diqqətə çatdırıb ki, Azərbaycanda manatın məzənnəsinin dəyişməsi FES-in qərarından deyil, birbaşa Mərkəzi Bankın (MB) qəbul etdiyi qərarlardan asılıdır: "Çünki MB praktik olaraq bazara təsir göstərir. Manatın məzənnəsinin kəskin dəyişməsi yalnız Mərkəzi Bankın öz siyasətini dəyişməsi halında mümkündür”.
Ayyət Əhməd
