Əgər Rusiyanın dövlət banklarının fəaliyyəti qadağan edilsə və ya hansısa valyutadan istifadəsinə qadağa qoyulsa, Rusiya bunu özünə qarşı iqtisadi müharibə elanı hesab edəcək.
Axar.az xəbər verir ki, bunu jurnalistlərə açıqlamasında Rusiyanın Baş naziri Dmitri Medvedyev deyib.
"ABŞ iqtisadi sanksiyalarını gücləndirsə, Rusiya buna həm iqtisadi, həm siyasi, həm də başqa metodlarla cavab verəcək. Əgər Rusiyanın dövlət banklarının fəaliyyəti qadağan edilsə və ya hansısa valyutadan istifadəsinə qadağa qoyulsa, Rusiya bunu özünə qarşı iqtisadi müharibə elanı hesab edəcək. Bizim amerikalı dostlarımız bunu anlamalıdırlar. Rusiya heç bir sanksiyadan qorxmur. Biz son 100 il ərzində daimi sanksiya təzyiqi şəraitində yaşamışıq” – deyə o bildirib.
Qeyd edək ki, bundan öncə ABŞ Skripal insidentinə görə, Rusiyaya qarşı sanksiyaların ikinci mərhələsinə hazırlaşdığını bəyan edib. Bu sanksiyalara əsasən Rusiya ilə diplomatik əlaqələrin səviyyəsi aşağı salınacaq, "Aeroflot”un və Rusiya hökumətinin nəzarətindəki digər aviaşirkətlərin ABŞ-a uçuşları dayandırılacaq, qida məhsulları istisna olmaqla, ABŞ-dan Rusiyaya ixracat tam dayandırılacaq və bu ölkədən ABŞ-a idxal (o cümlədən neft və neft məhsulları) qadağan ediləcək, Rusiyaya beynəlxalq maliyyə qurumlarından yardım və kreditlərin ayrılması əngəllənəcək.
