Son vaxtlar Bakı metrosunda baş verən hadisələrlə bağlı sərnişinlərin videosunun sosial şəbəkələrdə yayılması geniş yayılıb. Metroda sərnişinlərin narazılığına səbəb olan növbəti video sosial şəbəkələrdə geniş müzakirələrə səbəb olub.
Görüntülərə əsasən, vaqondakı xanım qatarda ayaqqabısını çıxararaq corabını dəyişib. Bundan sonra ayağından çıxardığı corabı iyləyərək, sərnişinlərin əyləşdiyi oturacağa atıb.
Bakı Metropoliteni mətbuat xidmətinin rəhbəri Bəxtiyar Məmmədovun məsələyə münasibəti belə olub: "Metroda sərnişinlərin təhlükəsizliyi və rahatlığını təmin etmək Metropoliten işçilərinin əsas vəzifəsidir. Biz sərnişinlərin hərəkətlərinə yalnız qanun çərçivəsində müdaxilə edə bilərik. Əgər sərnişinlərdən kimsə metroda ictimai asayişi pozubsa, o halda polis işə qarışa bilər. Lakin heç kəsə deyə bilmərik ki, ədəb qaydalarını gözlə. Bunu o hərəkətlərdən narahat olan sərnişinlər deyə bilər ki, rahatlığımıza mane olursan.
Həmin sərnişinlərdən şikayət edilərsə, bu halda qanun çərçivəsində sərnişinlərin rahatlığını pozan şəxslə bağlı cəza tədbiri görülə bilər. Bu məsələlərdə daha çox sosial şəbəkələr və ictimai qınaq rolunu oynamalıdırlar”.
Sözügedən görüntülərə baxanda gənc qızın psixoloji problemləri olduğu açıq-aşkar görünür. Əsas məsələ videonu çəkən şəxslərin görüntünü hansı məqsədlə yaymasıdır. Ən azından hansısa xəstəliyi olan, psixoloji durumu yerində olmayan birinə qarşı belə hərəkət heç də xoşagələn deyil.
Bu cür görüntüləri yaymağın ədəbsizlik olduğunu deyən sosioloq Əhməd Qəşəmoğlu "Şərq”ə bildirib ki, ümumiyyətlə, həmin qızın hansısa xəstəliyi və ya psixoloji problemi varsa, onu videoya çəkərək sosial şəbəkələrdə paylaşmaq insanlığa xas olan əlamət deyil: "Hərdən olur ki, ictimai nəqliyyatda, küçədə və başqa yerlərdə xəstə insanlara rast gəlirik. Hansı ki, onlar öz-özünə danışırlar və qəribə hərəkətlər edirlər. Amma həmin insan xəstəliyi ucbatından bunu edir. Belələrinə gülmək, onu lağa qoymaq ən aşağı insani xüsusiyyətlərdən biridir. Psixoloji problemi, xəstəliyi olan şəxs qəribə hərəkətləri kefindən etmir”.
Sosioloq bildirib ki, videonu yayan şəxslərin məqsədi heç də yaxşı deyil:
"Həmin şəxslər Azərbaycanın adına ləkə gətirmək, ölkəmizi aşağılamaq niyyətindədirlər. İstəyirlər nümayiş etdirsinlər ki, ölkəmizdə belə bir vəziyyət var. Təəssüf ki, ölkəmizdə bu cür iyrənc əməllərə maraq göstərən qüvvələr çoxdur. Həmin adamın özünün müəyyən problemləri var deyə belə görüntüləri yayır. Ya da şüurlu şəkildə Azərbaycanı gözdən salmaq üçün bunu edir”.
Yeganə Bayramova
