Türkiyə Böyük Millət Məclisinin 27-ci müddəti üçün təmsil olunan deputatların sayı artıb. Bununla əlaqədar Türkiyə Böyük Millət Məclisində geniş dəyişikliklər ediləcək. 27-ci dövr üçün Türkiyə Böyük Millət Məclisində millət vəkillərinin sayı 600 nəfərə yüksəlib. Bundan əvvəlki dövr üçün isə təmsil olunan millət vəkillərinin sayı 550 nəfər olub.
Qeyd edək ki, Azərbaycanda da Milli Məclisə seçilən deputatların sayının artırılması məsələsi əvvəllər bir neçə dəfə qaldırılsa da, reallaşmayıb. Əhalinin sayının artması faktına əsaslanan deputatlar iddia edir ki, ölkədə seçicilərin 3 milyonluq artımı deputatların sayını dəyişdirməyi diktə edir. Belə ki, 125 nəfərlik parlamentin formalaşdırılmasına Azərbaycan müstəqilliyini bərpa etdiyi illərdə, əhalinin sayı 7 milyondan az olduğu dövrdə qərar verilib. Əhalinin sayı artır və buna uyğun olaraq da, parlamentdə deputat yerlərinin artırılmasına da ehtiyac yaranır.
Millət vəkili, Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyev düşünür ki, deputatların sayı ən azı 150 nəfər olmalıdır. Yəni, 125-dən 150-yə qaldırılmalıdır.
Konstitusiya Araşdırmalar Mərkəzinin rəhbəri Əliməmməd Nuriyev də millət vəkillərinin sayının artırılmasının tərəfdarıdır:
"Azərbaycan əhalisinin sayı artıq 10 milyonu keçib. Bu baxımdan millət vəkillərinin sayının artırılmasına ehtiyac var. Əhalinin təmsilçiliyi tam mümkün olsun deyə, bu artım bütün regionları əhatə etməlidir”.
Parlamentin çox vacib struktur olduğunu vurğulayan Fond prezidenti deyib ki, MM-in fəaliyyətinin gücləndirilməsində deputatların sayının artırılmasının da faydası olacaq. Komissiyalar daha dolğun şəkildə işləmək imkanını genişləndirə bilərlər. Cənab prezident ölkədə iqtisadi islahatlarla yanaşı, siyasi islahatların aparılmasına dair xüsusi göstəriş verib. İdarəetmənin təkmilləşdirilməsi ilə bağlı Konstitutsiyaya edilən dəyişiklikər də deputatların sayının artırılmasına imkan yaradır.
Şəymən
