"Əgər Prezident artıq üçüncü dəfədir bunu ifadə edirsə, xarici işlər naziri Elmar Məmmədyarov bu yöndə açıqlamalar səsləndirirsə, deməli yenicə daxil olduğumuz 2019-cu ildə nisbətən də olsa müsbət dəyişikliklər gözlənilir”.
Bunu "Sherg.az”a açıqlamasında politoloq İlqar Vəlizadə deyib.
Analitik bildirib ki, son dönəmlər yaşanan proseslər fonunda diqqət çəkən məqamlar var. Bu məqamlar Dağlıq Qarabağ münaqişəsinin həlli istiqamətində müəyyən dəyişiklik gözləməyə ümidlər yaradır:
"Əslində ötən illər ərzində münaqişənin həlli istiqamətində irəliləyişlər üçün müəyyən şərait olub. Lakin Ermənistan rəhbərliyinin qeyri-ardıcıl siyasəti nəticəsində nikbinlik qısa zamanda ortadan qalxıb.
Danışıqlar prosesinə yaxın durmayan düşmən öz təxribatlarını o qədər artırıb ki, Azərbaycan tərəfi 2016-cı ildə və ondan sonrakı illərdə erməni ordusunun mövqelərinə ağır zərbələr vurub.
İndiki ümidlər onunla bağlıdır ki, Ermənistanın yeni hakimiyyəti sələflərinin aqibətindən ibrət alsın və onların xətasını təkrar etməsin. Əgər yeni hökumət danışıqlar prosesini davam etdirərsə, aparılan siyasətdə dəyişiklik edərsə, münaqişənin həlli ilə bağlı müsbət tendensiyaların şahidi ola bilərik”.
Bütün hallarda analitik düşünür ki, yeni yanaşmalar məsələlərin konkret müzakirəsi ilə bağlıdır:
"İlk növbədə torpaqlarımız geri qaytarılmalı və qaçqınlar öz yurdlarına geri dönməlidir. Bizim üçün ən mühüm və vazkeçilməz məqamlar bunlardır. Görünür, məhz bu məqamlarla bağlı tərəflərin danışıq aparması ehtimalı bir qədər də güclənib. Nikbinlik və ümidlər bununla bağlıdır”.
İsmayıl
