"Daşıyıcı şirkətlər marşrut avtobuslarının idarə olunması, sürülərin işə qəbulu, avtobusların müntəzəm yenilənməsi məsələlərində qanunun tələblərinə riayət etməlidirlər”.
Bunu "Sherg.az”a 202 saylı marşrut avtobusu sürücüsünün sükan arxasında narkotik qəbul etməsindən danışarkən nəqliyyat məsələləri üzrə ekspert Ərşad Hüseynov deyib.
O vurğulayıb ki, marşrut xəttinə nəzarət edən şəxslər sürücülük hüququ olmayan şəxsin sükan arxasında əyləşməsinə imkan verməməlidir:
"Deməli, nəzarət yoxdur və sürücüləri yoxlamadan işə götürürlər. Qanunlara riayət olmadığı yerlərdə isə belə problemlər mütləq yaranır. Sürücülər işə qəbul edildikdə tibbi müayinələrdən mütləq keçməli, hər gün işə başlamadan əvvəl yoxlanmalıdır. Onun tibbi durumu imkan vermirsə, narkotik, içki qəbul edibsə, o şəxs xəttə buraxıla bilməz.Yol nəqliyyat hadisələri baş verdikdə, sürücülərin bu cür qanunsuzluqlarına göz yuman daşıyıcı şirkətlər, aidiyyəti şəxslərin məsuliyyətsizliyi mütləq cəzalandırılmalıdır. Konkret araşdırma aparılmalı, sürücünün qanunsuz əməllərinə göz yuman şəxslər müvafiq cəzalar almalı, işindən uzaqlaşdırılmalıdır. 202 saylı marşrut avtobusunda baş verən hadisəyə, sürücünün özbaşınalığına göz yuman kolon rəisi barəsində də 15 gün inzibati həbs qərarı verilib. Bu cür ciddi cəzalandırma tədbirlərinin görülməsi vacibdir ki, belə xoşagəlməz hallar yenidən təkrarlanmasın”.
Qeyd edək ki, iyulun 23-də Bakıda sükan arxasında narkotik maddə qəbul edən Masallı rayon sakini, 1984-cü il təvəllüdlü Tağıyev İlkin Əlisəftar oğlu adlı avtobus sürücüsü həbs edilib. Məlum olub ki, 202 saylı marşrut xəttinin sürücüsü 09.04.2018-ci ildən etibarən sürücülük hüququndan məhrum edilib və bilərəkdən vəsiqəsini təhvil verməyib.
Aysel Aslan
