"Davos kimi forumlarda ən yüksək səviyyədə iştirakımız və beynəlxalq iqtisadi məkana inteqrasiyamız ölkəmizdə iqtisadi reformaların keçirilməsi və iqtisadiyyatın inkişafı üçün zəmin yaradır”.
Bunu "Sherg.az”a açıqlamasında "Altay” Sosial-İqtisadi Araşdırmalar Mərkəzinin rəhbəri Elçin Bayramlı deyib.
Ekspert bəyan edib ki, Davos İqtisadi Forumu ölkəmizə xarici investorların marağını artırır:
"Son illərdə davamlı iqtisadi islahatlar həyata keçirilir, biznesin inkişafı üçün maneələr aradan qaldırılır, sahibkarlığa dövlət dəstəyi artırılır. Bütün bunlar respublikamızın iqtisadi və sosial inkişafını sürətləndirir. Cənab Prezidentin Forumda verdiyi mesajlar çox əhəmiyyətlidir. Dövlət başçısı hər dəfə Forumda dünyanın böyük şirkətlərinin rəhbərləri ilə görüşür və bu görüşlərin nəticəsi olaraq onların ölkə iqtisadiyyatına investisiya qoyması üçün imkanlar açır. Bu ildən başlayaraq, vergi və gömrük sistemində həyata keçirilən islahatlar başa çatdıqda bunun nəticəsi özünü növbəti illərdə daha qabarıq biruzə verəcək.
Məqsəd ölkəmizdə çoxsaylı sənaye müəssisələri yaratmaq, Ümümi Daxili Məhsulu artırmaq, ixracı genişləndirmək və idxaldan asılılığı azalmaqdır”.
Ekspertin sözlərinə görə, neft sektorundan asıllığı tamamilə ləğv etmək kursu əsas götürülüb:
"Bütün bunların nəticəsində həm dövlət büdcəsinin gəlirləri artacaq, həm məşğulluq problemi həllini tapacaq, həm də əhalinin sosial vəziyyəti yaxşılaşacaq”.
İsmayıl
