"Qarabağ klanının rəhbərləri - Serj Sarkisyan və Robert Koçaryan baş nazir Nikol Paşinyanla bağlı prosesləri yaxından izləyirlər. Getdikcə eks prezidentlərin ritorikası sərtləşir. Koçaryandan sonra Sarkisyan da siyasətə qayıtdığını bəyan edir”.
Bu sözləri Ermənistandakı siyasi gərginliklə bağlı "Şərq”ə danışan Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu deyib.
Analitik bildirib ki, baş nazir Nikol Paşinyanın reytinqini itirdiyi bir vaxtda sabiq rəhbərlər də öz planlarını işə salırlar:
"Paşinyanın səviyyəsiz və savadsız olması, danışığını bilməməsi ictimaiyyət arasında nüfuzunu xeyli aşağı salır. Xüsusən də xalqa verdiyi vədləri yerinə yetirməməsi onun perspektivini sıfıra endirir. Sarkisyan və Koçaryan isə yaranmış vəziyyətdən istifadə etmək istəyirlər. Əslində parlament seçkisi Nikol Paşinyana maneçilik törətmirdi. Əgər baş nazir bacarıqlı idarəçi ola bilsəydi, öz reytinqini saxlayar və qarşıdakı seçkilərlə bağlı narahatlığı olmazdı. Lakin baş nazir bunu bacarmadı. İnqilab liderləri içərisində ən qısa müddətdə nüfuzunu itirən yeganə şəxs Nikol Paşinyandır. Onun xətaları çoxdur, ən kobud səhvi isə hakimiyyətə gələn kimi "Yüksək Gərginlikli Elektrik Xəttləri” Şirkətinin rəhbəri Samvel Karapetyanı vəzifəsindən almaqdır.
Karapetyan Taşir qrupunun başçısıdır və hazırda Moskvada yaşayır. Onun Putin və Medvedyevlə, digər siyasilərlə çox yaxın əlaqələri var. Elə Samvel Karapetyanı böyük maddi vəsaitlə Ermənistana göndərən də Putinlə Medvedyev idi. Onlar istəyirdilər ki, Karapetyan bu sahəni dirçəltsin və ölkənin xarici borcunu ödəsin. Ancaq Paşinyanın məlum qərarı ölkənin enerji məsələsini böhrana sürüklədi və Ermənistanın xarici borcunu artırdı. Yəni baş nazir Nikol Paşinyan həm xarici və daxili siyasətdə, həm də iqtisadiyyatda səriştəsiz adam olduğunu sübut etdi.
Halbuki Paşinyan pulu və əlaqəsi çox olan Karapetyana yalvararaq ondan daha çox yararlanmalı idi. Çünki İrəvanlı olduğuna görə Karapetyanın Sarkisyanla və Köçəryanla münasibəti yaxşı deyildi. Məsələ ondadır ki, Karapetyan dünya erməniləri içində ən nüfuzlu adam sayılır. Belə bir şəxsi vəzifədən qovan Paşinyan nə ABŞ-dan, nə də Rusiyadan maddi dəstək ala bilər”.
Ekspert vurğulayıb ki, Paşinyanın yanlış addımları və qərarları onu siyasi rəhbərlikdən uzaqlaşdırır və rəqiblərinin şansını artırır: "Serj Sarkisyan və Robert Koçaryanın nəzəri cəhətdən siyasi rəhbərliyə gəlmələri mümkündür. Amma onlar heç vaxt əvvəlki güclərini bərpa edə bilməzlər”.
İsmayıl
