"Siyasətimizin mərkəzində Azərbaycan vətəndaşı dayanır və vətəndaşın rifahı üçün əlimizdən gələni edirik”.
Bunu Prezident İlham Əliyev aprelin 30-da Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışı zamanı deyib.
Qayğıya ehtiyacı olan vətəndaşlarımız hər zaman dövlətin diqqətində olub. Aztəminatlı ailələrə, qaçqın və məcburi köçkünlərə, tələbələrə göstərilən həssas münasibət prezidentin hər zaman xalqımızın yanında olduğunu göstərir. Görülən təbdirlər ictimaiyyət nümayəndələri tərəfindən də böyük rəğbətlə qarşılanır.
Prezidentin çıxışı ilə bağlı "Sherg.az”a danışan sabiq millət vəkili Həvva Məmmədova bildirib ki, cənab prezident hər zaman vətəndaşlara diqqət göstərib.
Onun sözlərinə görə, ölkə başçısı hər zaman bununla bağlı müvafiq tədbirlər görür:
"Cənab Prezidentin ardıcıl olaraq həyata keçirdiyi sosial siyasətin əsasını qaçqın və məcburi köçkünlərimizin məişət şəraitinin yaxşılaşdırılması təşkil edir. Təsadüfi deyil ki, köçkünlər üçün tikilən komplekdə yalnız mənzillər deyil, məktəblər, bağçalar da var.
Hətta mənzillərdə mətbəx avadanlıqlarına qədər bütün şərait yaradılıb. Prezidentin apardığı siyasətin məqsədində vətəndaşa xidmət amili dayanır. Bu siyasət təkcə bu gün deyil, 15 ildir ki, davam edir. Aparılan təhlillər və müqayisələr göstərir ki, prezidentimiz siyasətində hər zaman vətəndaşlarımıza xidmət amili əsas meyardır”.
Yeganə Bayramova
