Ukraynanın yeni prezidenti Vladimir Zelenski bütün rusiyalılara Ukrayna pasportunun verilməsi təşəbbüsü ilə çıxış edib. Bu, Donbasda yaşayanlara Rusiya pasportlarının paylanmasına cavab reaksiyası olub. Zelenskinin təşəbbüsünü Rusiya prezidenti özünəməxsus şəkildə cavablandırıb. Vladimir Putin deyib ki, Zelenskinin mövqeyi razılığa gələ biləcəklərini göstərir: "Ümumi cəhətlərimiz çoxdur. Rusiyalılar və ukraynalılar ümumi vətəndaşlıqdan yalnız qazanardılar. Ümumiyyətlə, hesab edirəm ki, ruslar və ukraynalılar əslində eyni xalqdır. Özünəməxsus mədəniyyətləri, dilləri və tarixləri ilə, amma mahiyyətcə eyni xalq”.
Yeni prezident Zelenski ilə Rusiya lideri Putin arasındakı "yumşalmanı” dəyərləndirən ekspertlər normal müzakirələrin bir sıra nəticələr verə biləcəyini istisna etməyiblər.
Məsələ ilə bağlı "Şərq”ə danışan politoloq İlqar Vəlizadə deyib ki, Zelenski özündən əvvəlki liderlərin səhvlərini təkrarlamaq istəmir. Ekspertin fikrincə, Zelenski xüsusən Poroşenkonun həyata keçirdiyi siyasətdən tamamilə uzaqlaşmaq niyyətindədir:
"Rusiya prezidenti Avropa tərəfdaşlarına bir mesaj verir ki, o, Zelenski ilə danışıqlara hazırdır, amma əsas məsələ Ukraynanın yeni prezidentinin necə mövqe ortaya qoyacağı ilə bağlıdır. Yəni demək istəyir ki, əgər Kiyev tərəfi hazırdısa, Moskva da müəyyən addımlar ata bilər. Əslində bu münaqişə artıq köhnələn konfliktlər sırasına keçməkdədir.
Təcrübə göstərir ki, belə köhnəlmiş münaqişələrə xaricdən maraq azalır. Xüsusən, Avropa İttifaqı üçün daha önəmli və əlverişli şərait yaranır ki, Rusiya ilə münasibətləri yenidən nəzərdən keçirsin və münasibətlərə yeni dinamika versin. Çünki münaqişə tərəflərin ortaq müzakirəsinə imkan vermir. Düşünürəm ki, Avropa bu yükdən azad olmaq üçün müəyyən səy göstərə bilər. Əlverişli şəraiti nəzərə alan Rusiya və Ukrayna, eyni zamanda Avropa ölkələri - Fransa və Almaniya münaqişənin həllini tezləşdirmək arzusundadır. Ancaq müzakirələrin nə dərəcədə faydalı olacağını ancaq zaman göstərəcək”.
İsmayıl
