Qoyun ətindən fərqli olaraq, quzu ətinin qiyməti qalxıb. Hazırda bazarda bir kiloqram quzu ətinin qiyməti 14 manatdır.
Satıcıların sözlərinə görə, qiymətlər bir aya yaxındır ki, qalxıb. Onlar qiymət artımına səbəb olaraq bu aylarda yaşanan quzu qıtlığını əsas gətirirlər. Tələb çox olduğundan bölgələrdə əmlik quzu tapmaq müşkülə çevrilib.
Məsələ ilə bağlı Kənd Təsərrüfatı Nazirliyindən bildirilib ki, nazirlik ətin qiymətinin müəyyən edilməsində iştirak etmir. O ki qaldı bölgələrdə yaşanan quzu qıtlığına, nazirlikdən qeyd edilib ki, bu, düzgün yanaşma deyil.
Qiymətin qalxmasına bayram günlərində quzu ətinə tələbin çox olması səbəb ola bilər. Ekspertlər də quzu ətinin bahalaşmasını düzgün hesab etmirlər.
İqtisadçı-ekspert Əkrəm Həsənovun "Şərq”ə açıqlamasına görə, iqtisadi nöqteyi-nəzərdən quzu ətinin qiymətinin artmasına obyektiv bir əsas yoxdur: "Kənd Təsərrüfatı vergidən azaddır. Hesab edirəm ki, Kənd təsərrüfatı naziri də bu gün Azərbaycanın ən yaxşı və dürüst işləyən dövlət məmurlarından biridir. Ona görə bu sahədə qanunvericilik, inzibatçılıq, vergi kimi problemlər mövcud deyil. Məhz bu səbəblərdən fikrimcə, qiymət artımı üçün heç bir əsas yoxdur. Adətən digər ölkələrdə bayramqabağı qiymətlər aşağı düşür, bizdə isə əksinədir. Məncə, bu qiymət artımı sünidir” .
Yeganə Bayramova
