Rusiyalı ekspert Oleq Kuznetsov Dağlıq Qarabağ münaqişəsinin sülh yolu ilə həllinin mümkün olmadığını deyib. Onun sözlərinə görə, Dağlıq Qarabağ münaqişəsi qlobal geosiyasət çərçivəsində Cənubi Qafqazdan kənarda yerləşən qüvvələr tərəfindən istifadə olunur: "Münaqişə Qafqazda yaradılmayıb, ona görə də onun sülh yolu ilə həlli mümkün deyil. Bu münaqişənin əsas benefisiarları nə Bakıda, nə də İrəvandadır”. Ekspert həmçinin vurğulayıb ki, Dağlıq Qarabağ münaqişəsinin xalqların sülhə hazırlanması yolu ilə həll ediləcəyinə inanmır: "Mən bu haqda hələ 2012-ci ildə yazmışam. Hesab edirəm ki, Samuel Hantinqtonun "Sivilizasiyaların toqquşması” nəzəriyyəsi Dağlıq Qarabağ münaqişəsinin mahiyyətini izah edir. Çünki düşünürəm ki, bu, doğrudan da sivilizasiyaların, bir-birinə zidd dünyaların toqquşmasıdır”.
Kuznetsovun sözlərini "Şərq”ə dəyərləndirən politoloq Əhəd Məmmədli rus ekspertin haqlı olduğunu bəyan edib. Analitik bildirib ki, elə Azərbaycan ictimaiyyəti və politoloqlar da illərdir bunu deyirlər:
"Dağlıq Qarabağ münaqişəsinin sülh yolu ilə həlli mümkün deyil. Kənar qüvvələr deyəndə Kuznetsov həm Rusiyanı, həm ABŞ-ı, çox güman ki, bir də Türkiyəni nəzərdə tutur. Sivilizasiyaların qarşıdurması deyəndə isə müsəlman-xristian məsələsini vurğulamağa çalışır. Yəni diqqətə çatdırır ki, Ermənistanın arxasında Rusiya durursa, Azərbaycanın da yanında qardaş Türkiyə dayanır. Fikrimcə, kənar qüvvələr deyəndə Kuznetsov bunu düşünüb. Demək istəyir ki, Qarabağda sivilizasiyalar daha lokal səviyyədə toqquşub. Rus həmkarıma bu cür yanaşmada haqq qazandırıram. Reallığı əks etdirən fikirlərdir”.
İsmayıl
