"Biz hələ informasiya arxasınca sürünürük. Məsələ qurtarandan sonra müzakirəyə başlayırıq”.
Bunu "Sherg.az”a açıqlamasında siyasi elmlər doktoru, professor Cümşüd Nuriyev deyib.
Professor bildirib ki, Suriyada erməni taborunun yaradılması çox ciddi məsələdir:
"Yeni terror təşkilatının yaradılması həm Türkiyəyə, həm də Azərbaycana qarşı atılmış bir addımdır. Bir məqamı vurğulamaq lazımdır ki, Suriyanın erməni terror təşkilatı yaradılan ərazisi ABŞ-ın yox, Rusiyanın nəzarətindədir.
PKK-nı yaradan ASALA-dır. Terrorçuların rəhbəri Abdullah Öcalan da ermənidir. Anası kürd olsa da, atası ermənidir.
Erməniləri yenidən ortaya atanların məqsədi region ölkələri arasındakı münasibəti korlamağa xidmət edir. Rusiya Suriya ərazisində PKK-nı gücləndirməklə Türkiyəyə təzyiq rıçağını əlində saxlamağa çalışır. Şübhəsiz ki, bu, Azərbaycana qarşı da siyasi təzyiq növüdür. Atılan addımlar Rusiyanın Qafqaz siyasətinə xidmət edir.
Türkiyə son 300 ildə Rusiya ilə apardığı 10 müharibənin 6-da ruslara qalib gəlib. Hazırda Türkiyə-Rusiya münasibətləri yaxşı görünsə də, alt qatda Moskva keçmişin intiqamı ilə alışıb-yanır. Ona görə də Türkiyə ehtiyatı əldən verməməlidir”.
Analitikin fikrincə, ermənilərin yenidən silahlı dəstə yaratması xarici güclərin layihəsidir:
"Necə ki, 1984-85-ci illərdə ermənilərin əliylə PKK-nı yaratdılar, indi də kürdlərin əli ilə erməni terror təşkilatını qurmağa çalışırlar. Bu təhlükə sadəcə Suriya və İranla kifayətlənməyəcək. Erməni terror təşkilatının təlimi üçün ən "əlverişli” məkan Dağlıq Qarabağdır. Problem isə ondadır ki, Qarabağı düşməndən təmizləyənə qədər bu cür şantajlara və təhdidlərə məruz qalacağıq”.
Qeyd edək ki, Suriyada YPG-nin nəzdində 200 nəfərlik erməni taboru yaradılıb. Erməni qruplaşmanın Türkiyə və Azərbaycanı hədəfə aldıqları deyilir.
İsmayıl
