"Rusiyada prezident seçkiləri əvvəldən gözlənildiyi kimi nəticələndi”.
Bunu "Sherg.az”a Rusiyada baş tutan prezident seçkilərindən danışarkən politoloq Tofiq Abbasov deyib.
O xatırladıb ki, seçki kampaniyasında iştirak edən namizədlərdən ikisi – Vladimir Putin və Pavel Qrudinin diqqətə layiq idi:
"Bu namizədlərin birinci, ikinci yerləri bölüşdürməsi məntiqi baxımdan özünü doğrultdu. Qələbə çalan tərəf həmişə iradların hamısını rədd edir. Məğlub olmuş namizədlər isə hər zaman olduğu kimi seçkidə ciddi pozuntular olduğunu iddia edir. Bu, təbii vəziyyətdir. Bütün bunlara rəğmən, seçkilərin nəticələri proqnozlara tam uyğun oldu”.Prezident V.Putinin bundan sonrakı hakimiyyəti müddətində atacağı addımlara gəlincə, politoloq Rusiyanın islahatlara meyl edəcəyini düşünür:
"Bundan sonra Rusiyanın böyük islahatlar proqramı qarşısında daha məsuliyyət göstərməsi məqsədəuyğun olar. Çünki ölkənin vəziyyəti o qədər də qənaətbəxş deyil. Xarici rəqiblərin təpkisi, daxildə həllini gözləyən sosial-iqtisadi problemlər Putin və komandasını hərəkətə keçirməlidir. Prezident antiböhran proqramının olduğunu bəyan etmişdi. Ümid edirik ki, yaxın vaxtlarda bu proqramın nədən ibarət olduğunu biləcəyik”.
Qeyd edək ki, Rusiya Mərkəzi Seçki Komissiyası (MSK) prezident seçkilərinin nəticələrini açıqlayıb. Belə ki, səsvermənin nəticələrinə görə, prezident Vladimir Putin prezident seçilib.
İkinci yerdə isə Kommunist Partiyasının namizədi, Lenin adına Sovxozun direktoru Pavel Qrudinindir. Nəticələrə görə, üçücü yerdə liberal demokrat Vladimir Jirinovski, dördüncü yerdə isə Kseniya Sobçak qərarlaşıb.
Aysel Aslan
