Gürcüstan hakimiyyətinin barəsində axtarış elan etdiyi Odessanın qubernatoru Mixail Saakaşvili vətəninə parlament seçkilərindən sonra qayıdacağına söz verib.
Məlumata görə, o, yaratdığı "Vahid milli hərəkat” Partiyasının 2016-cı ilin oktyabr ayında keçiriləcək parlament seçkilərində qalib gələcəyinə əmin olduğunu bəyan edib: "Bu seçkiləri keçirmək və qalib gəldikdən sonra gəlib qələbə çalan adamlara kömək etmək lazımdır”.
Sabiq lider onu da qeyd edib ki, Gürcüstanın siyasi həyatında indi yalnız iki lider - o və keçmiş baş nazir Bidzina İvanişvili var: "İndiki mərhələdə üçüncü adam yoxdur. Bu mənim üzərimə böyük məsuliyyət qoyur, bir daha təkrar edirəm, Ukraynada başqa vəzifə üçün can atmadığım kimi, Gürcüstanda da heç nə üçün çalışmıram. Mənim vəzifəm ondan ibarətdir ki, heç zaman olmadığı kimi daha yaxşı olum”.
M.Saakaşvilinin vədini şərh edən politoloq Elxan Mehdiyev "Şərq”ə açıqlamasında söyləyib ki, bu, keçmiş prezidentin borcudur: "Partiyanın lideri kimi bu cür çıxış etmək onun işidir. Təbii ki, Gürcüstanda demokratik inkişaf gedir və seçkilərin şəffaf keçirilməsinə şərait var. Amma Saakaşvilinin Gürcüstanda olmamasının partiyasına mənfi təsirləri çoxdur. Digər yandan düşünürəm ki, Saakaşvili seçkilərdən öncə ölkəsinə qayıdarsa, Gürcüstan polisi onu saxlayacaq. Saakaşvilisiz onun partiyasının qalib gələcəyini proqnozlaşdırmaq çətindir. Hər halda onun partiyası parlamentdə yer alacaq. Amma qalib gəlmələrinə dair konkret söz demək çətindir”.
Ayyət
