Rusiya Liberal-Demokrat Partiyasının lideri Vladimir Jirinovski Mixail Qorbaçovdan Dağlıq Qarabağa görə cavab verməyi tələb edib. Jirinovskinin partiyası M.Qorbaçovun siyasi cinayətkar kimi tanınması üçün Dövlət Dumasına qanun layihəsi də göndərib.
Məlumat üçün deyək ki, qanun layihəsi qəbul olunarsa, Qorbaçov bir çox məsələlərlə bağlı, həmçinin, Dağlıq Qarabağın Ermənistan tərəfindən işğalına yaratdığı şərait üçün cavab verməli olacaq. Rusiyalı analitiklər düşünürlər ki, ölkədə on milyonlarla insan bu təşəbbüsü dəstəkləyə bilər. Jirinovskinin təşəbbüsünü dəyərləndirən millət vəkili Elman Məmmədov "Şərq”ə açıqlamasında deyib ki, RLDP-nin lideri vaxtaşırı sensasiya yaradacaq bəyanatlar verir və hər zaman olmasa da, çox vaxt düzgün ifadələr səsləndirir: "Sizə bir tarixi xatırlatmaq istəyirəm. 1991-ci ilin yanvar ayının 8-də Dağlıq Qarabağdan olan bir qrup azərbaycanlı ilə birlikdə Mərkəzi Komitənin katibi Oleq Semyonoviç Şeninlə görüşdük. Orada mən, Şuşanın ovaxtkı rəhbərliyi, professor Cümşüd Nuriyev, general Mustafa Nəsirov, Ağdamın, Laçının əvvəlki icra başçıları və başqaları var idi. Onun otağında üzünə dedim ki, 1988-ci ildən bəri postsovet məkanında milli münaqişə zəminində baş verən bütün hadisələrə görə Mixail Qorbaçov məsuliyyət daşıyır. Vaxt gələcək o, bunlara görə cavab verməli olacaq. İndi bunu Jirinovski deyir, çox düz və haqlı edir. Qorbaçov SSRİ-nin rəhbəri kimi ölkədə baş verən bütün cinayətlərə görə cavabdehdir. Çünki sovet ittifaqında milli münaqişənin qızışdırılması, dinc insanların qanının tökülməsi, ərazilərin işğal olunması birbaşa Qorbaçov tərəfindən həyata keçirilib. O, konkret olaraq günahkardır. Güman edirəm ki, həqiqətən vaxt gələcək və Qorbaçov öz cəzasını alacaq. Əgər Jirinovskinin təklifi ilə bağlı hansısa səsvermə, referendum keçirilərsə, mən böyük məmnuniyyətlə onun lehinə səs verəcəm. Sağ olsun Jirinovski ki, belə haqlı tələblə çıxış edir”.
İsmayıl
