"Aprel ayı tək şəhid ailələrinin deyil, bütün xalqın qəlbində qələbə ayı kimi qaldı”.
Bunu Sherg.az-a aprel döyüşlərinin ildönümü ilə əlaqədar danışarkən Xüsusi Təyinatlı Qüvvələrin polkovnik-leytenantı, şəhid Murad Mirzəyevin atası Telman Mirzəyev deyib.
O bildirib ki, ötən ilin aprel ayında, 23 ildən sonra torpaqlarımızın müəyyən bir hissəsinin geri qaytarılması xalqın qələbəni dadmasına şərait yaratdı:
"Qəhrəmanımız Murad Mirzəyev isə bir hərbçi, zabit kimi xalqımızın xidmətində durmaq, torpaqlarımızın keşiyi çəkmək borcunun öhdəsindən gələ bildi. Onun işi vətən uğrunda mübarizə aparmaq idi. Bu xidmətini layiqincə yerinə yetirib, şəhidlik zirvəsinə ucaldı. Bu, allahın bir qisməti idi”.
2016-cı ilin aprel ayının yaddaşımızda həmişə qalacağını söyləyən şəhid atası, vətən uğrunda canını qurban vermiş övladlarımızın xatirəsinin əziz tutulmasından, dövlətin onlara verdiyi ən yüksək diqqət və qayğıdan, Azərbaycan xalqının Murad Mirzəyevə və ümumən şəhidlərə olan sayğısından razılığını ifadə edib:
"Bu günlərdə hər kəs vətəni qorumaq lazım olduğunu anlayır. Könüllü olaraq hərbi xidmətə gedir, xalqın müdafiəsində durur. Bu gün heç çağırışa ehtiyac olmadan gənclər özləri hərbi xidmət keçmək üçün müraciət edir. Bütün bu ruh yüksəkliyi Azərbaycanı qələbəyə bir az da yaxınlaşdırır”.
Aysel Aslan
