Xəbər verdiyimiz kimi, ABŞ-ın Azərbaycandakı səfiri Robert Sekutanın diplomatik fəaliyyəti martın 27-də başa çatır. Səfirin ayın sonunda Azərbaycanı tərk edəcəyi gözlənilir. Sekuta 2015-ci ilin fevralından Azərbaycanda səfir vəzifəsinin icrasına başlayıb.
3 ildən bir qədər artıq müddətdə ölkəsinin diplomatik nümayəndəliyinə rəhbərlik etmiş Sekuta ABŞ-ın Bakıya göndərdiyi ən "dişsiz” səfirlərdən biri kimi dəyərləndirilir. Fəaliyyəti dövründə siyasi proseslərə heç bir reaksiya verməyən Sekuta ABŞ-Azərbaycan münasibətlərinin gərginləşdiyi dönəmlərdə də hər hansı təşəbbüsü ilə yadda qalmayıb. Bununla belə, Sekuta dəvət olunduğu mədəni tədbirlərin "bəzəyinə” çevrilib. Bütün bayramlarda həvəslə iştirak edən ABŞ səfiri milli kulinariyaya marağı üzündən "fəxri dequstator” adını layiqincə haqq edib. Xatırladaq ki, qarşıdan gələn Novruz bayramı amerikalı diplomatın Azərbaycanda qatılacağı sonuncu şənlik olacaq. Maraqlıdır, görəsən, yerli politoloqlar dünyanın yeganə superdövləti statusunu özündə saxlayan ABŞ-ın son 3 ildə Azərbaycanda nümayəndəsi olan Sekutanın fəaliyyəti haqqında nə fikirləşirlər? Sekutanın fəaliyyətini dəyərləndirən politoloq Elxan Şahinoğlu amerikalı diplomatın heç nə ilə yadda qalmadığı qənaətindədir: "Sekutanın səfir postuna təyinatı və onun öz vəzifəsinin icrasına başlaması xeyli yubandı. Lakin bu prosedurlar öz həllini tapdıqdan sonra Sekuta nəhayət, işinin başına keçə bildi. Ancaq təəssüf ki, Sekutanın diplomatik fəaliyyəti barəsində geniş danışmaq mümkün deyil. Onun xüsusilə, ciddi məsələlərdə səssiz qalması, həmçinin, ikitərəfli münasibətlərin inkişafı üçün ciddi addımlar atmaması hər zaman tənqid olunub. O baxımdan, Sekutanın fəaliyyət dövrünün effektiv olmadığını deyə bilərik. Xatırladım ki, vaxtilə ABŞ-ı Azərbaycanda təmsil edən Rino Harniş və Riçard Armitac öz fəallıqları ilə seçilirdilər, bütün ciddi məsələlərə münasibət bildirirdilər. Ancaq Sekuta haqqında bunları demək mümkün deyil. O, bütün qeyri-siyasi tədbirlərdə iştirak etsə də, aktual məsələlərdə sükuta üstünlük verirdi. Bu səbəbdən necə fəaliyyət göstəribsə, elə də xatırlanacaq”.
Analitik bildirib ki, Sekutanın xələfinin kim olacağı maraqlı görünsə də, hələ məlum deyil: "Ümumiyyətlə, ABŞ-da səfir təyinatları çox mürəkkəb prosedurlardan keçir. Xatırlayırsızsa, Metyu Brayza və Riçard Armitacla bağlı prosedurlar çox uzandığından, onlar rəsmi təyinat olmadan fəaliyyətə başlamışdılar. ABŞ-ın Cənubi Qafqazın əsas dövləti olan Azərbaycana səfir təyinatını yubatması, diplomatlar arasında seçim edərkən, bir sıra mühüm nüansları nəzərə almaması əlbəttə ki, Vaşinqtonun ziyanınadır. Belə bir vəziyyətdə Rusiya diplomatiyası fəallaşır və ABŞ-ın vəziyyəti düzəltmək imkanları çətinləşir”.
İsmayıl
