Ədliyyə Nazirliyi yenə də Azərbaycan Demokratiya və Rifah Hərəkatını dövlət qeydiyyatına almaqdan imtina edib. Müsavat Partiyasının sabiq funksioneri, iqtisadçı Qubad İbadoğlunun rəhbərlik etdiyi hərəkata bundan əvvəl də iki dəfə rədd cavabı verilib.
Hərəkat üzvləri nazirliyin qeydiyyatdan imtina cavabının qanuni olmadığını deyiblər. Bu barədə "Şərq”ə açıqlama verən ADR-in sədr müavini Vurğun Əyyub bildirib ki, verilən qərar mövcud qanunlara ziddir: "Qeydiyyatla bağlı birinci müraciətimiz geri çevrildi və müəyyən çatışmazlıqların olduğu iddia edildi. Xəbərdarlığı nəzərə alaraq, səhvləri düzəltdik və yenidən nazirliyə müraciət etdik. Amma yenə də bizi qeydiyyata almadılar. Əgər iradları var idisə, hansısa sənəddə problem görürdülərsə, birinci müraciətdə bütün yanlışlıqlar haqda bizə xəbərdarlıq edilməli idi. Ancaq qurum hər dəfə yeni "səhv” tutur. Əslində bütün sənədlər və tələblər qaydasındadır. Heç bir problem yoxdur. Buna baxmayaraq, nazirlik ADR-i qeydiyyata almır. Ədliyyə Nazirliyinin bir sənədi iki-üç dəfə geri qaytarmağa hüquqi səlahiyyəti çatmır”. V.Əyyubun fikrincə, söhbət sənədlərin düzgün olub-olmamasından getmir. Nazirlik faktiki olaraq ADR-i dövlət qeydiyyatına almaq istəmir: "Hesab edirəm ki, bunun arxasında müəyyən siyasi məqsədlər dayanır. Halbuki ADR siyasi yox, ictimai bir təşkilatdır”. Hərəkatın sədr müavini növbəti müraciətin mənasız olacağını deyib: "Çox güman ki, növbəti dəfə yenə bəhanə uyduracaqlar. Ona görə də qeydiyyat məsələsinin məhkəmə müstəvisində həll olunmasının tərəfdarıyam. Əlbəttə, bu, şəxsi fikrimdir. Hələlik ADR-də məsələ müzakirə edilməyib. Hərəkatın rəhbərliyi çərçivəsində müzakirələr aparıldıqdan sonra yekun qərar alınacaq”.
İsmayıl
