"Sərnişindaşıma ilə məşğul olan şirkətlərin avtobusların, nəqliyyat vasitələrinin çoxunun istismar müddəti başa çatıb”.
Bunu "Sherg.az”a son günlər marşrut avtobuslarının gecikməsi haqqında sərnişinlərin şikayətlərinə münasibət bildirərkən nəqliyyat eksperti İlqar Hüseynli deyib.
O bildirib ki, bəzi marşrut xətlərində 10-12 illik avtobuslar fəaliyyət göstərir:
"Ümumiyyətlə, ölkədə nəqliyyatın satışı, ölkəyə gətirilməsi ilə bağlı məhdudiyyət tətbiq edilib. 2003-cü ildən əvvəl istehsal olunmuş maşınların satış üçün gətirilməsi qadağandır. Lakin ölkədə 90-cı hətta 80-ci illərin istehsalı olan maşınlar hərəkətdə davam edir. Əslində insanların həmin illərin maşınlarını sürmək haqqı var. Sadəcə həmin maşınlar texniki cəhətdən saz olmalıdır.
Marşrut xətləri üzrə fəaliyyət göstərən şirkətlərdən yalnız "Bakubus” şirkətinin avtobusları texniki cəhətdən hələlik problemli deyil. İctimai nəqliyyat vasitələrinin digər xətlər üzrə yenilənməməsi tez-tez sınmalar, yolda qalmalar yaradır. Ona görə, avtobuslar azalır.
Tıxaclarla bağlı məsələlər isə aydındır. Günün müxtəlif saatlarında şəhərin əsas hissələrində tıxaclar yaranır. Bundan başqa bəzi yol, nəqliyyat infrastrukturunda təmir-söküntü işləri ümumilikdə avtobusların gecikməsi probleminə gətirib çıxarır”.
İctimai nəqliyyatda yaranan problemlərin maliyyə qıtlığından qaynaqlanması iddialarına gəlincə, ekspert vurğulayıb ki, söylənənlərin əksinə gediş haqqının qaldırılması hələlik real deyil:
"Gediş haqqı tarifləri Tarif Şurası tərəfindən tənzimlənir. Hələlik bu qurum gediş haqlarının bahalaşması ilə bağlı elə mesaj yoxdur. Bu, sadəcə, ortaya atılmış əsassız fikirlərdir. İctimai nəqliyyatın problemləri maliyyə çətinliklərindən qaynaqlanmır”.
İ.Hüseynli avtobus sürücülərinin dayanacaqlara daxil olmaması ilə bağlı sərnişinlərin şikayətlərinə də aydınlıq gətirib. Onun fikrincə, bəzi sürücülər belə hallara yol verir:
"Bu, düzgün addım deyil. Bəzi hallarda isə mən də müşahidə etmişəm ki, sürücülər obyektiv səbəblərdən dayanacağa daxil ola bilmir. Ya digər nəqliyyat vasitələri düzgün park etmir, ya da dayanacaq həddən çox sıxlıq olur. Lakin bütün bunlar monitorinq edilir, avtobus sürücülərinin fəaliyyətinə nəzarət olunur. Şirkətlər belə məsələlərdə çox ayıq-sayıqdırlar, çünki söhbət pulun qazanılmasından gedir”.
Qeyd edək ki, bu gün səhər saatlarında Məmmədov Firudin Yaqub oğlu adlı paytaxt sakini redaksiyamızla əlaqə saxlayaraq, 96 saylı sərnişindaşıma avtobuslarının fəaliyyətindən narazılıq ifadə edib. Şikayətçi qeyd edib ki, Binəqədi rayonunda "Şamaxinka" adlanan ərazidən şəhər istiqamətinə gəlmək üçün sözügüdən marşrut avtobsunu 37 dəqiqə gözləməli olub. Bunun başına gələn birinci hal olmadığını bildirən sakin onu da söyləyib ki, ləngimələrlə bağlı Bakı Nəqliyyat Agentliyinin (BNA) qaynar xətti-141-ə dəfələrlə məlumat versə də, problem hələ də həllini tapmayıb.
Aysel Aslan
