"Prezidentlərin Tehran görüşü əvvəlcədən planlaşdırılan idi”.
Bunu "Sherg.az”a İran, Azərbaycan və Rusiya prezidentlərinin görüşünün nəticələrindən danışarkən millət vəkili, siyasi elmlər doktoru Elman Nəsirov deyib.
O xatırladıb ki, Şimal-Cənub nəqliyyat dəhlizinin reallaşması istiqamətində prezidentlərin Bakıda görüşü baş tutmuşdu:
"Bu səfər çərçivəsində ilk növbədə Hindistandan başlayıb, Pakistandan keçən, İrana, oradan Azərbaycana, Rusiya və Şimali Avropaya nəqliyyat daşımalarını reallaşdıran xətt barədə müzakirələr aparılacaq. Tehran görüşündə bu layihə üçün həlledici addımlar atılması gözlənilir. Çünki Şimal-Cənub dəhlizinin reallaşmasına az qalıb.
Görüşdə üçtərəfli formatda əməkdaşlığın inkişafı ilə yanaşı ikitərəfli danışıqlar da aparılacaq. Bu isə ilk növbədə regionda əməkdaşlığın genişləndirilməsi, enerji, nəqliyyat təhlükəsizliyi məsələlərinə töfhə vermək baxımından vacibdir. Görüşün keçirilməsindən sonra bu sahədə atılan addımlarla bağlı daha dəqiq məlumat əldə edəcəyik”.
Qeyd edək ki, Azərbaycan, Rusiya və İran prezidentlərinin üçtərəfli sammiti öz işinə başlayıb. Görüşdə Şimal-cənub dəhlizi, regionda üç ölkəni maraqlandıran önəmli məsələlər müzakirə olunacaq.
Aysel Aslan
