Türkiyə Prezidenti Rəcəb Tayyib Ərdoğan Suriyadakı müharibədən qaçaraq ölkəsinə sığınan qaçqınlara Türkiyə vətəndaşı olmaq şansı veriləcəyini bəyan edib. Məlumata görə, Kilis şəhərində suriyalı qaçqınlar üçün verilən iftarda danışan ölkə Prezidenti bildirib ki, vətəndaşlıq məsələsi ilə bağlı Daxili İşlər Nazirliyinə müvafiq tapşırıqlar verib:
"İnanıram ki, qardaşlarımız arasında Türkiyə Respublikasının vətəndaşı olmaq istəyənlər var. Məsələ ilə bağlı Daxili İşlər Nazirliyi müəyyən addımlar atıb. Nazirliyimiz xüsusi şöbə vasitəsilə bu köməyi edəcək və qardaşlarımıza vətəndaşlıq veriləcək. Siz vətəninizdəsiniz, sadəcə evinizdən uzaq düşmüsünüz”.
Yada salaq ki, Türkiyənin ərazisində yaradılan sığınacaq və düşərgələrdə 2,7 mln. suriyalı məskunlaşıb. Suriyada vətəndaş müharibəsi 2011-ci ilin mart ayından başlayıb və bu günə qədər davam edir. Savaş hökumət qüvvələri və ABŞ, Avropa Birliyi ölkələri, Türkiyə, Səudiyyə Ərəbistanı və Qətər tərəfindən dəstəklənən silahlı terrorçu qruplar arasında gedir. Müharibə nəticəsində yarım milyona yaxın insan həyatını itirib, milyonlarla insan qaçqın düşüb.
Ərdoğanın addımını şərh edən "Şərq-Qərb” Araşdırmalar Mərkəzinin rəhbəri, politoloq Ərəstun Oruclu qeyd edib ki, həmin qaçqınları deportasiya etmək də mümkün deyil: "Bundan başqa, onlar hazırda qeyri-müəyyən statusda olduqları üçün öz əmək qabiliyyətlərini və iş imkanlarını gerçəkləşdirə bilmirlər. Bu səbəbdən də radikalların qurbanına çevrilirlər. Mənə elə gəlir ki, onlara vətəndaşlığın verilməsi Türkiyədəki təhlükəni bir qədər də azalda bilər”.
Ayyət Əhməd
