"ATƏT-də sədrlik rotasiya qaydasına uyğun olaraq İtaliyadan Slovakiyaya keçdi. Təşkilatın fəaliyyət sırasına Avropada həll olunmamış münaqişələrin nizamlanması, sülh və təhlükəsizliyin təmin olunması, ölkələrin suverenliyinin təmini və dəstəklənməsidir”.
Bunu "Sherg.az”a açıqlamasında "Cənubi Qafqaz” Sülh və Münaqişələrin Həlli Mərkəzinin rəhbəri Məhəmməd Əsədullazadə deyib.
Analitik bildirib ki, Azərbaycan üçün bu təşkilatın əsas xüsusiyyəti Qarabağ münaqişəsinin həllində rol oynamasıdır:
"Məhz ATƏT-in Minsk Qrupu 25 ilə yaxındır ki, Ermənistanın işğalı nəticəsində meydana gəlmiş münaqişənin həlli ilə "məşğul” olur. Amma bu təşkilatın təsir və təzyiq mexanizmi olmadığı üçün fəaliyyəti yalnız tövsiyə xarakteridir. Buna görə də təşkilatın münaqişlərin həllində rolu təsirsizdir.ATƏT-in hər il yeni vəzifəyə başlayan sədri Qarabağ münaqişənin həlli ilə bağlı işlərin sürətlənməsi və danışıqlar prosesinə töhfə verəcəyi kimi açıqlamalar verir. Ötən il İtaliya sədrliyə gələndə, bu ölkənin XİN rəhbəri konfliktin həllində yaxından iştirak edəcəyini iddia etmişdi. Əslində İtaliyanın Azərbaycanla siyasi əlaqələri yüksək səviyyədədir, ona görə də italyan sədrin bəyanatını rəsmi Bakı tərəfindən yüksək dəyərləndirilmişdi. İtaliya konfliktin həllinə Azərbaycanın ərazi bütövlüyü prizmasından baxır”.
Ekspertin sözlərinə görə, hazırda ATƏT əraźisində münaqişələr daha da mürəkkəb mərhələyə qədəm qoyub:
"Sədrliyə gətirilən Slovakiyanın münaqişələrin həllində hər hansı irəliyə addım atacağı gözlənilmir. Baxmayaraq ki, bu ölkənin də Azərbaycanla əlaqələri yüksək səviyyədədir. Slovakiya ölkəmizə silah satışı həyata keçirən Avropa ölkəsidir. Bu, o deməkdir ki, Slovakiya da Azərbaycanın ərazi bütövlüyünü dəstəkləyir. Təbii ki, Slovakiya Qarabağ münaqişəsinin həlli ilə bağlı sədr səviyyəsində yaxından iştirak edəcək. Nəzərə alaq ki, il ərzində danışıqlar prosesi yeni mərhələdə davam etməlidir. Konflikt ətrafında müəyyən gözləntilər var. Məhz bu fonda Slovakiya ATƏT sədri olaraq ölkəmizə siyasi dəstək verə bilər”.
Siyasi şərhçinin fikrincə, hazırda Avropanın şərqində ciddi təhlükəsizlik böhranı yaşanır:
"Ukraynanın şərqində separatizm, Rusiyanın Krımı anneksiyası, Kerç böhranı, Cənubi Qafazda həll edilməmiş münaqişələr Slovakiyanın sədrliyi dövründə daha da böhranlı fazaya keçib. Demək olar ki, ATƏT yeni qlobal şərtlərə cavab vermir. Avropada təzə təhlükəsizlik strukturuna ehtiyac var. Əgər bu mümkün deyilsə, ATƏT-ın nizamnaməsində dəyişikliklər edilə bilər. Ən azından təzyiq mexanizmlərini əlavə etmək lazımdır. Çünki ATƏT-in hüquqi və tövsiyə xarakterli fəaliyyəti, müasir regional və qlobal böhranlı vəziyyətlərə adekvat deyil”.
İsmayıl
